पुणे : पुण्यात लोणी काळभोर परिसरात मुळा-मुठा नदीपात्रात निमयित मोठ्या प्रमाणात कचरा टाकून तो जाळला जात आहे. या कचऱ्यामुळे विषारी धूर पसरला आणि पाच महाविद्यालयीन विद्यार्थ्यांना रुग्णालयात दाखल करावे लागले. या विद्यार्थ्यांना श्वास घेण्यास त्रास झाल्यामुळे त्यांना रुग्णालयात दाखल केले आहे. यानंतर खबरदारीचा उपाय म्हणून नदीपात्राजवळ असलेल्या एका कंपनीने आपल्या सर्व कर्मचाऱ्यांना एक दिवसाची विशेष सुट्टी जाहीर केली. तर विद्यार्थ्यांच्या सुरक्षेसाठी एमआयटी शैक्षणिक संकुलाने संकुलात शिकणाऱ्या २० हजार विद्यार्थ्यांना एक दिवसाची विशेष सुट्टी दिली.
पुणे महानगर प्रदेश विकास प्राधिकरणाच्या अग्निशमन दलाने नदीपात्रातील कचऱ्याला लावलेली आग नियंत्रणात आणली. नदीपात्रातल्या कचऱ्यात नेमके कोणते घटक होते हे जाणून घेण्यासाठी शास्त्रोक्त पद्धतीने तपास सुरू आहे. नदीपात्रातील पाण्याचे आणि कचऱ्याचे नमुने तपासणीसाठी पाठवण्यात आले आहेत. कचऱ्याच्या व्यवस्थापनासाठी प्रशासनाने विशेष व्यवस्था करावी अशी मागणी स्थानिकांनी केली आहे.
नदीपात्रात कचरा सतत टाकला जात असल्याने आग वारंवार भडकत असल्याचे मुख्य अग्निशमन अधिकारी देवेंद्र पोटफोडे यांनी सांगितले. या प्रकरणी तपासातून अधिक माहिती हाती येईल, असेही ते म्हणाले.
