नागपूर : नागपूर जिल्ह्यातील काटोल तालुक्यातील राऊळगाव येथे असलेल्या SBL कंपनीत १ मार्च रविवारी सकाळी सुमारे ७ वाजता भीषण स्फोट झाला. बारुद आणि डेटोनेटरसह विविध स्फोटक साहित्य तयार करणाऱ्या या कंपनीत झालेल्या स्फोटात १२ कामगारांचा मृत्यू झाल्याची प्राथमिक माहिती पोलिसांकडून देण्यात आली आहे. तसेच किमान १५ जण जखमी असून त्यांच्यावर जवळच्या रुग्णालयात उपचार सुरू आहेत.
स्फोटानंतर आग; बचावकार्य वेगात :
स्फोट इतका तीव्र होता की परिसरात मोठा आवाज होऊन नागरिकांमध्ये भीतीचे वातावरण निर्माण झाले. घटनेनंतर कारखान्याच्या परिसरात आग लागली असून अग्निशामक दलाने तातडीने घटनास्थळी धाव घेतली. पोलीस आणि बचाव पथकांकडून मदतकार्य सुरू आहे. दरम्यान, मृतांच्या नातेवाईकांनी घटनास्थळी मोठी गर्दी केली असून परिसरात संतापाचे वातावरण पाहायला मिळत आहे. स्फोटाचे नेमके कारण अद्याप स्पष्ट झालेले नाही.
आमदारांचा गंभीर आरोप :
काटोलचे आमदार चरणसिंग ठाकूर यांनी मात्र या दुर्घटनेत १५ जणांचा मृत्यू आणि २० जण जखमी झाल्याचा दावा केला आहे. कंपनीकडून सुरक्षेच्या नियमांकडे दुर्लक्ष करण्यात आल्याचा गंभीर आरोप त्यांनी यावेळी केला. आवश्यक प्रशिक्षण आणि सुरक्षा उपाययोजना न करता कामगारांकडून काम करून घेतले जात असल्याचेही त्यांनी म्हटले आहे.
वर्षभरापूर्वीही अशाच प्रकारची घटना :
याच राऊळगाव शिवारातील कोतवालबड्डी परिसरात वर्षभरापूर्वी ‘एशियन फायर वर्क्स’ या स्फोटक कंपनीतही मोठा स्फोट झाला होता. फटाक्यांची वात तयार करताना झालेल्या त्या स्फोटात चार कामगारांपैकी दोघांचा मृत्यू झाला होता, तर दोघे जखमी झाले होते.
सध्याच्या दुर्घटनेनंतर पुन्हा एकदा औद्योगिक सुरक्षेच्या मुद्द्यावर प्रश्नचिन्ह निर्माण झाले आहे.
