मुंबई: चेंबूर येथील सुभाष नगर परिसरातील बांधकाम सुरू असलेल्या इमारतीवरून सहा मजूर पडले. या दुर्घटनेत एकाचा मृत्यू झाला तर अन्य पाच जण जखमी झाले. दरम्यान शनिवारी २८ फेब्रुवारी २०२६ रोजी दुपारी घडलेल्या या दुर्घटना स्थळी महापौर रितू तावडे यांनी तातडीने भेट दिली. तसेच घाटकोपर येथील राजावाडी रुग्णालयात जाऊन जखमी मजुरांची विचारपूसही त्यांनी केली.
आदित्य राज या विकासकामार्फत इमारत बांधकाम सुरू आहे. बांधकाम सुरू असलेल्या या इमारतीत सातव्या मजल्याचे काम सुरू असताना परांची कोसळून ही दुर्घटना घडली. या अपघातात सहा जण खाली कोसळले. त्यापैकी एका मजुराचा दुर्दैवाने मृत्यू झाला. तर अन्य पाच जणांवर राजावाडी रुग्णालयात उपचार सुरू आहेत. मजूर नेमके कसे कोसळले, याची माहिती घेतली असता या बांधकाम स्थळी अतिशय निष्काळजीपणा करण्यात आल्याचे प्रथमदर्शनी आढळून आले आहे. अशा प्रकारचा हलगर्जीपणा अजिबात खपवून घेतला जाणार नाही. कायद्याअंतर्गत कामगारांना सर्व प्रकारच्या सुरक्षा साधनांचा अवलंब करणे गरजेचे आहे. तसेच कार्यस्थळावर अभियंता वर्गाच्या देखरेखीखाली काम होणे आवश्यक आहे. अपघात झाला, तेव्हा अभियंता कुठे होता? यासह विविध बाबी तपासणी गरजेचे आहे, असे महापौर रितू तावडे यांनी सांगितले.
या दुर्घटनेबाबत प्राथमिक माहिती घेतली आहे. त्यानुसार, बेजबाबदारपणे काम करणाऱ्या विकासक आणि कंत्राटदार यांच्याविरोधात कठोर कारवाई करण्यात यावी. तसेच मनुष्यवधाचा गुन्हा दाखल करण्यात यावा. तसेच अशा घटना भविष्यात होऊ नये यासाठी मुंबई महानगरपालिका व म्हाडा प्राधिकरणाने योग्य ती खबरदारी घ्यावी, असेही निर्देशही महापौर रितू तावडे यांनी प्रसार माध्यमांशी बोलताना सांगितले.
या घटनेत जखमी झालेल्या रुग्णांची विचारपूस करण्यासाठी महापौर रितू तावडे या राजावाडी रुग्णालयात पोहचल्या. उपचार सुरू असलेलया पाच पैकी एका मजुराची प्रकृती गंभीर असल्याने त्याला अतिदक्षता विभागात दाखल करण्यात आले आहे. जखमी सर्व रुग्णांवर आवश्यक ते सर्व वैद्यकीय उपचार करण्याचे निर्देश रुग्णालय प्रशासनाला दिले आहेत, असे महापौरांनी नमूद केले. यावेळी उप महापौर संजय घाडी आणि विरोधी पक्षनेता किशोरी पेडणेकर हे उपस्थित होते.
