क्रिकेटचा थाला अशी ओळख असणाऱ्या भारतीय क्रिकेट संघाचा माजी कर्णधार महेंद्रसिंग धोनीला झारखंड राज्य गृहनिर्माण मंडळाने नोटीस बजावली आहे. ही नोटीस रांची येथील त्याच्या निवासी भूखंडाच्या व्यावसायिक वापराबद्दल असल्याचे सूत्रांनी सांगितले आहे. या नोटीसनुसार, धोनीला निवासी उद्देशांसाठी वाटप केलेल्या मालमत्तेतून पॅथॉलॉजी लॅब चालवली जात असल्याचा आरोप आहे.
नेमकं प्रकरण काय ?
झारखंड स्टेट हाऊसिंग बोर्डाने धोनीला एक अधिकृत नोटीस बजावली असून, ही नोटीस रांचीमधील हरमू परिसरातील एका निवासी प्लॉटशी संबंधित आहे. H-10A क्रमांकाच्या या प्लॉटबाबत बोर्डाने गंभीर आक्षेप नोंदवले असून, नियमांचे उल्लंघन झाल्याचा दावा केला आहे. हाऊसिंग बोर्डाच्या आरोपांनुसार, संबंधित प्लॉट केवळ राहण्याच्या उद्देशाने देण्यात आला होता.
धोनीने पॅथॉलॉजी लॅब चालवली?
मात्र, सध्या त्या ठिकाणी कथितरीत्या एक पॅथॉलॉजी लॅब चालवली जात असल्याची माहिती समोर आली आहे. निवासी क्षेत्रात व्यावसायिक उपक्रम राबवणे हे वाटप नियमांच्या अटींचे थेट उल्लंघन असल्याचे बोर्डाचे म्हणणे आहे. या प्रकरणी धोनीकडून स्पष्टीकरण मागवण्यात आले असून प्रशासकीय वर्तुळात खळबळ उडाली आहे.
नियमांचे उल्लंघन कोणासाठीही खपवून घेतले जाणार नाही :
बोर्डाने आपल्या नोटीसमध्ये स्पष्ट केले आहे की, जर १५ दिवसांच्या आत धोनीकडून समाधानकारक उत्तर मिळाले नाही, तर या प्लॉटचे वाटप रद्द करण्याची शिफारस केली जाऊ शकते. हाऊसिंग बोर्ड सध्या अशा सर्व प्रकरणांची चौकशी करत आहे, जिथे निवासी जागांचा वापर कमर्शियल कामांसाठी केला जात आहे. नियमांचे उल्लंघन कोणासाठीही खपवून घेतले जाणार नाही, असा थेट इशारा अधिकाऱ्यांनी दिला आहे.