मुंबई: महाराष्ट्राचे अधिकृत राज्यगीत असलेल्या ‘जय जय महाराष्ट्र माझा, गर्जा महाराष्ट्र माझा’ या गीताची धून आता महापालिका सभागृहातही लावली जाणार आहे. भाजपच्या नगरसेविका आणि शिक्षण समिति अध्यक्षा राजेश्री शिरवडकर यांनी केलेल्या सूचनेला मंजुरी देत महापालिका सभागृहात एकमताने याचा ठराव करण्यात आला. त्यामुळे आता महापालिका सभागृहात या राज्यगीताची धून ऐकायला मिळणार आहे.
महाराष्ट्राचे अधिकृत राज्यगीत असलेल्या ‘जय जय महाराष्ट्र माझा, गर्जा महाराष्ट्र माझा’ हे गीत महाराष्ट्रातील जनतेच्या अभिमानाचे प्रतीक असून ते ऐकताच प्रत्येक मराठी मन अभिमानाने भरून येते. शासनाच्या निर्णयानुसार हे गीत शासकीय कार्यक्रमांमध्ये तसेच राज्यातील सर्व शाळांमध्ये सकाळच्या परिपाठाचा अनिवार्य भाग करण्यात आले आहे. त्यामुळे विद्यार्थ्यांच्या मनात राष्ट्रप्रेम, मराठी अस्मिता आणि संस्कृतीची जपणूक यांची भावना अधिक दृढ होत असल्याचे मत व्यक्त करण्यात आले आहे.
मराठी भाषा संवर्धन आणि सांस्कृतिक अस्मितेच्या जतनासाठी कवी राजा बढे यांच्या ओजस्वी शब्दरचनेतून आणि शाहीर साबळे यांच्या दमदार आवाजातून साकारलेले हे गीत नव्या पिढीपर्यंत प्रभावीपणे पोहोचविणे गरजेचे असल्याचे ठरावात नमूद करण्यात आले आहे. या पार्श्वभूमीवर, मुंबई महानगरपालिकेच्या सभागृहात राष्ट्रगीतानंतर ‘जय जय महाराष्ट्र माझा’ या राज्यगीताची धून वाजविण्यात यावी, अशी मागणी ठरावाच्या सूचनेद्वारे शिक्षण समिती अध्यक्षा राजेश्री शिरवडकर यांनी महापालिका सभागृहात केली. ही सूचना महापौरांनी गुरुवारी झालेल्या बैठकीत मंजूर केली.
या प्रस्तावामुळे महानगरपालिकेच्या कामकाजात महाराष्ट्राच्या सांस्कृतिक अभिमानाची नवी भर पडेल, असा विश्वास शिरवडकर यांनी व्यक्त केला होता. या ठरावामुळे याची अंमलबजावणी लवकरच महापालिका सभागृहात केली जाणार आहे.
