मुंबई : पालघर जिल्ह्यातील डहाणू तालुक्यात आरोग्य विभागाच्या निष्काळजीपणामुळे घडलेल्या प्रसूती प्रकरणाचे पडसाद आज (२६ फेब्रुवारी) विधानपरिषदेत उमटले. आमदार प्रवीण दरेकर यांनी डहाणूतील आरोग्य केंद्रांमधील अपुऱ्या सुविधा, डॉक्टरांची अनुपस्थिती आणि रिक्त पदांबाबत सरकारला धारेवर धरले. याला उत्तर देताना महिला व बालविकास मंत्री मेघना साकोरे-बोर्डीकर यांनी दोषींवर कडक कारवाई केल्याची आणि रिक्त पदे भरण्यासाठी विशेष पावले उचलल्याची घोषणा केली.
प्रवीण दरेकर यांनी आरोग्य केंद्राच्या कारभारावर तीव्र संताप व्यक्त केला. "आशागड प्राथमिक आरोग्य केंद्रात ३८ हजार आदिवासी लोकसंख्या असतानाही डॉक्टर का नसतात? परिचारिकांनी प्रसूती करणे हे रुग्णांच्या जीवाशी खेळणे नाही का?" असे प्रश्न त्यांनी उपस्थित केले. तसेच, मागील वर्षभरात आरोग्य कर्मचाऱ्यांच्या गैरवर्तवणुकीच्या किती तक्रारी आल्या आणि त्यावर काय चौकशी केली, असा जाबही त्यांनी विचारला. यासोबतच त्यांनी पालघर जिल्ह्यातील आरोग्य विभागातील रिक्त पदांचा मुद्दाही मांडला.
आमदार दरेकर यांच्या प्रश्नांना उत्तर देताना मंत्री मेघना बोर्डीकर यांनी माहिती दिली की, सुदैवाने माता आणि बालकाची प्रकृती स्थिर आहे. मात्र, या प्रकरणातील गांभीर्य लक्षात घेता, आशागड केंद्रातील वैद्यकीय अधिकाऱ्याचे (MO) तातडीने निलंबन करण्यात आले आहे, तर कंत्राटी तत्त्वावरील दोन डॉक्टरांची सेवा खंडित (Terminate) करण्यात आली आहे. पालघर जिल्ह्यात वैद्यकीय अधिकाऱ्यांची अनेक पदे रिक्त आहेत. ही पदे भरण्यासाठी २७ फेब्रुवारी पासून नवी भरती प्रक्रिया राबवण्यात येणार आहे, ज्यामुळे रिक्त पदांचा प्रश्न सुटेल. पालघरमध्ये नवीन २०० खाटांचे जिल्हा रुग्णालय, १०० खाटांचे स्त्री रुग्णालय आणि क्रिटिकल केअर ब्लॉकला मंजुरी मिळाली असून त्याचे काम लवकरच पूर्ण होईल. तसेच, ४६ पैकी २८ प्राथमिक आरोग्य केंद्रे ही 'कायाकल्प' योजनेसाठी पात्र ठरली असून तेथे दर्जेदार सुविधा दिल्या जात आहेत.
