मुंबई: मुंबई महापालिकेचा सन २०२६-२७ चा अर्थसंकल्प येत्या बुधवारी मांडला जाणार असून तब्बल तीन वर्षांनतर महापालिका स्थायी समिती अध्यक्ष हे अर्थसंकल्प स्वीकारणार आहेत. प्रशासक कालावधीमध्ये महापालिका अतिरिक्त आयुक्त यांच्यावतीने प्रशासक असलेल्या आयुक्तांना अर्थसंकल्प सादर केला जात असे. परंतु आता महापालिका स्थापन होवून स्थायी समिती अध्यक्षपदी निवड झाल्यामुळे महापालिका आयुक्त डॉ भूषण गगराणी हे नवनिर्वाचित अध्यक्ष प्रभाकर शिंदे यांना अर्थसंकल्प सादर करणार आहे. त्यामुळे आयुक्तांकडून तीन वर्षानंतर स्थायी समिती अध्यक्ष हे अर्थसंकल्प स्वीकारणार आहेत.
मुंबई महापालिकेचा अर्थसंकल्प येत्या बुधवारी स्थायी समितीमध्ये सादर केला जाणार आहे. महापालिका आयुक्त डॉ भूषण गगराणी हे स्थायी समिती अध्यक्ष प्रभाकर शिंदे यांना आपला अर्थसंकल्प सादर करणार आहेत. तत्पूर्वी शिक्षण समिती अध्यक्ष राजेश्री शिरवडकर यांना उपायुक्त (शिक्षण) डॉ प्राची जांभेकर शिक्षण विभागाचा अर्थसंकल्प सादर करणार आहेत.
मुंबई महापालिकेची मुदत ७ मार्च २०२२ रोजी संपुष्टात आली. त्यापूर्वी ४ फेब्रुवारी २०२२ रोजी इक्बालसिंह चहल यांनी तत्कालिन स्थायी समिती अध्यक्ष यशवंत जाधव यांना अर्थसंकल्प सादर केला होता. त्यानंतर सन २०२३ पासून २०२५ पर्यंत सलग तीन वर्षे महापालिका प्रशासकांच्यावतीने अर्थसंकल्प मांडला जात आहे. अतिरिक्त आयुक्त प्रकल्प यांच्यावतीने प्रशासकांना अर्थसंकल्प सादर केला जात होता. त्यामुळे आता महापालिका अस्तित्वात आल्यामुळे आता तीन वर्षांनंतर प्रथमच शिक्षण समिती अध्यक्ष आणि स्थायी समिती अध्यक्ष यांना आयुक्तांच्यावतीने अर्थसंकल्प सादर केला जाणार आहे.
मागील अर्थसंकल्प हा ७४ हजार ४०० कोटी रुपयांचा होता. परंतु आता त्यातील अनेक पायाभूत विकास प्रकल्प मार्गी लागल्यामुळे आता या अर्थसंकल्पाचा आकार वाढला जावून तब्बल दहा हजार कोटींनी याचा आकार वाढला जाण्याची शक्यता आहे. त्यामुळे ८४ ते ८५ हजार कोटी रुपयांच्या घरात महापालिका अर्थसंकल्पाचा आकार वाढला जाण्याची दाट शक्यता आहे.
