मुंबई: मराठी सिनेसृष्टीमधील लोकप्रिय अभिनेत्री सोनाली कुलकर्णी हिच्यावर दुःखाचा डोंगर कोसळला आहे. सोनाली कुलकर्णीच्या अगदी जवळच्या व्यक्तीचं निधन झालं आहे. यासंदर्भात सोनालीनं स्वतः पोस्ट करत माहिती दिली आहे. मराठी अभिनेत्री सोनाली कुलकर्णीचा चुलत भाऊ अनिरुद्ध याचं निधन झालं आहे. भावाच्या जाण्यानं खचलेल्या अभिनेत्रीनं समाज माध्यमावर इमोशन पोस्ट शेअर केली आहे. अनिरुद्धच्या जाण्यानं सोनालीसह तिच्या कुटुंबीयांवरही दुःखाचा डोंगर कोसळला आहे.
सोनाली कुलकर्णीने सोशल मीडियावर केलेल्या पोस्टमध्ये म्हटलंय की, "आमचा अन्नूमा... हे जग सोडून तू एका चांगल्या ठिकाणी निघून गेलास. तुझ्या आत्म्याला शांती लाभो. तिकडे वेदनारहित नवीन आयुष्य मिळो. अध्यात्मिक, निरागस आणि जीव लावणारा असा मला माहीत असलेला सर्वात निर्मळ मनाचा व्यक्ती तू होतास. तुझं प्रत्येकासोबत छान नातं होतं. सगळ्यांवर निस्वार्थ प्रेम केलंस. सगळी गाणी तुला माहीत होती. तबला अगदी छान वाजवायचास...आणि तुझ्या हातचा चहा... तू जसा होतास तसाच राहिलास आणि सगळ्यांना प्रेम दिलंस. तुझ्यावर नेहमीच प्रेम करत राहू. ओम शांती".
सोनाली कुलकर्णीच्या पोस्टवर चाहत्यांनी दु:ख व्यक्त केलं आहे. त्याचबरोबर सोनालीच्या भावाला श्रद्धांजली वाहिली आहे. अनेकांनी सोनालीच्या पोस्टवर कमेंट करुन तिचं सांत्वन केलं आहे.
दरम्यान, मराठी सिनेसृष्टीतील आघाडीची अभिनेत्री म्हणून सोनाली कुलकर्णी ओळखली जाते. तिने अनेक मराठी चित्रपटांसह हिंदी चित्रपटांमध्येही काम केलं आहे. त्यासोबतच सोनाली कुलकर्णीनं मल्ल्याळम फिल्ममध्येही काम केलं आहे.
