मुंबई : रिअॅलिटी शोच्या दुनियेतून प्रसिद्धी मिळवलेले आणि फिटनेस क्षेत्रात स्वतंत्र ओळख निर्माण करणारे स्प्लिट्सविला सीझन ७ मधील स्पर्धक मयंक पवार यांचे निधन झाले आहे. अवघ्या ३७व्या वर्षी त्यांनी जगाचा निरोप घेतल्याची माहिती समोर आली असून चाहत्यांमध्ये शोककळा पसरली आहे.
सोशल मीडियावरून दिली माहिती
मयंक यांच्या अधिकृत इंस्टाग्राम हँडलवरून त्यांच्या निधनाची बातमी जाहीर करण्यात आली. “भाऊ, मार्गदर्शक आणि प्रेरणादायी व्यक्तिमत्त्व” अशा शब्दांत त्यांना श्रद्धांजली वाहण्यात आली. ही पोस्ट काही मिनिटांतच व्हायरल झाली आणि चाहत्यांकडून संवेदना व्यक्त केल्या जाऊ लागल्या.
हृदयविकाराचा झटका आल्याची प्राथमिक माहिती
प्राथमिक माहितीनुसार हृदयविकाराच्या झटक्यामुळे त्यांचा मृत्यू झाल्याचे समजते. २५ फेब्रुवारी २०२६ रोजी सायंकाळी ५ ते ६ दरम्यान राणा प्रताप बाग येथील संगम पार्क परिसरातील वाल्मिकी मंदिरात प्रार्थना सभेचे आयोजन करण्यात आले आहे.
रिअॅलिटी शोमधून लोकप्रियता
‘स्प्लिट्सविला ७’मध्ये सहभाग घेतल्यानंतर मयंक प्रेक्षकांच्या नजरेत आले. शांत, संयमी आणि प्रामाणिक व्यक्तिमत्त्वामुळे त्यांना विशेष पसंती मिळाली होती. शोमधून बाहेर पडताना सूत्रसंचालिका सनी लिओनी देखील भावुक झाल्याचीही चर्चा त्यावेळी रंगली होती.
फिटनेस क्षेत्रातील दमदार ओळख
रिअॅलिटी शोच्या पुढे जात मयंक यांनी बॉडीबिल्डिंग आणि फिटनेस विश्वात स्वतःचे स्थान निर्माण केले. ‘मिस्टर इंडिया’ स्पर्धेत अनेक वेळा विजेतेपद पटकावत त्यांनी फिटनेस आयकॉन म्हणून नावलौकिक मिळवला. सेलिब्रिटी प्रशिक्षक म्हणूनही त्यांनी काम केले होते. अनेक तरुण खेळाडूंना त्यांनी मार्गदर्शन करत होता.
त्यांच्या अचानक जाण्याने सोशल मीडियावर विविध तर्कवितर्कांना उधाण आले आहे. काहींनी फिटनेस क्षेत्रातील आरोग्यविषयक धोके आणि स्टिरॉइड्सच्या वापराबाबत प्रश्न उपस्थित केले जात आहेत.