मुंबई : महाराष्ट्र विधिमंडळाच्या अर्थसंकल्पीय अधिवेशनाला सोमवारपासून सुरुवात झाली. या अधिवेशन कालावधीत उपमुख्यमंत्री एकनाथ शिंदे यांनी स्वतःकडील खात्यांची जबाबदारी मंत्रिमंडळातील अन्य सहकाऱ्यांकडे दिली आहे.
विधानसभा अध्यक्ष राहुल नार्वेकर यांना पत्र लिहून शिंदे यांनी पदभार अन्य मंत्र्यांकडे सोपवत असल्याची माहिती दिली. एकनाथ शिंदे यांच्याकडे एकाहून अधिक खात्यांचा कारभार असून, ते विधानपरिषदेचे सभागृह नेते देखील आहेत. त्यामुळे एकाचवेळी दोन्ही सभागृहाचे कामकाज हाताळणे शक्य नसल्याने त्यांनी आपल्याकडील खात्यांचा कार्यभार आपल्या पक्षातील मंत्र्यांकडे सोपवला आहे. स्वतःकडील विभागांचा कार्यभार सांभाळून हे मंत्री अतिरिक्त खात्यांचा कारभार पाहतील.
एकनाथ शिंदे यांनी विधानसभा अध्यक्षांना दिलेल्या पत्रानुसार, सार्वजनिक बांधकाम विभागाची जबाबदारी मंत्री दादाजी भुसे यांच्याकडे, नगर विकास विभाग मंत्री उदय सामंत यांच्याकडे, तर गृहनिर्माण विभागाची जबाबदारी मंत्री शंभूराजे देसाई यांच्याकडे सोपवण्यात आली आहे. अधिवेशन कालावधीत ते या खात्याचे प्रभारी मंत्री म्हणून उत्तरे देतील.
