मार्को आणि महाराजच्या फिरकीपुढे भारताची शरणागती
अहमदाबाद : दक्षिण आफ्रिकेने फलंदाजी आणि गोलंदाजी अशा दोन्ही आघाड्यांवर चमकदार कामगिरी करत भारताचा ७६ धावांनी धुव्वा उडवला. १८८ धावांच्या आव्हानाचा पाठलाग करताना भारतीय फलंदाजी पत्त्याच्या बंगल्यासारखी कोसळली आणि संपूर्ण संघ १८.५ षटकांत अवघ्या १११ धावांत गारद झाला. दक्षिण आफ्रिकेकडून मार्को जानसेनने ४, तर केशव महाराजने ३ बळी घेत भारताच्या डावाला खिंडार पाडले.
नाणेफेक जिंकून प्रथम फलंदाजी करणाऱ्या दक्षिण आफ्रिकेची सुरुवात खराब झाली होती. दक्षिण आफ्रिकेचे पॉवरप्लेमध्ये, पहिल्या ६ षटकांत अवघ्या २० धावांत ३ फलंदाज (डी कॉक ६, मार्करम ४ आणि रिकलटन ७) माघारी परतले होते. मात्र, त्यानंतर 'बेबी एबी' म्हणून ओळखल्या जाणाऱ्या डेवाल्ड ब्रेविस (४५ धावा, २९ चेंडू) आणि अनुभवी डेव्हिड मिलर (६३ धावा, ३५ चेंडू) यांनी चौथ्या गड्यासाठी ९७ धावांची महत्त्वपूर्ण भागीदारी रचली. मिलरने आपल्या खेळीत ७ चौकार आणि ३ षटकार खेचले. शेवटच्या षटकांत ट्रिस्टन स्टब्सने नाबाद ४४ धावांची वेगवान खेळी केल्यामुळे दक्षिण आफ्रिकेने निर्धारित २० षटकांत ७ बाद १८७ धावांचा डोंगराळ टप्पा गाठला. भारताकडून जसप्रीत बुमराहने अत्यंत प्रभावी गोलंदाजी करत १५ धावांत ३ बळी घेतले, तर अर्शदीप सिंगला २ यश मिळाले.
१८८ धावांच्या लक्ष्याचा पाठलाग करताना भारताची सुरुवात अत्यंत निराशाजनक झाली. सलामीवीर ईशान किशन शून्यावर बाद झाला, तर टिळक वर्मा केवळ १ धाव करून तंबूत परतला. कर्णधार सूर्यकुमार यादव (१८) आणि अभिषेक शर्मा (१५) मोठी खेळी करण्यात अपयशी ठरले. मधल्या फळीतील शिवम दुबेने (४२ धावा, ३७ चेंडू) एकाकी झुंज देण्याचा प्रयत्न केला, पण त्याला दुसऱ्या टोकाकडून कोणाचीही साथ मिळाली नाही. रिंकू सिंग आणि जसप्रीत बुमराह शून्यावर बाद झाले, तर हार्दिक पांड्याला (१८) केशव महाराजने चालते केले. भारताचा डाव १८.५ षटकांत १११ धावांवर आटोपला.
अहमदाबाद : आयसीसी पुरुष टी ट्वेंटी वर्ल्डकपच्या सुपर एट फेरीतील सामन्यात दक्षिण आफ्रिकेने नाणेफेक जिंकून फलंदाजीचा निर्णय घेतला. प्रथम फलंदाजी ...
दक्षिण आफ्रिकेच्या विजयाचा खरा शिल्पकार ठरला तो मार्को जानसेन. त्याने ३.५ षटकांत २२ धावा देत ४ महत्त्वाचे बळी टिपले. त्याला फिरकीपटू केशव महाराजने (३ बळी) आणि कॉर्बिन बॉशने (२ बळी) उत्तम साथ दिली. लुंगी एनगिडीने ४ षटकांत केवळ १५ धावा देत भारतीय फलंदाजांवर दडपण कायम ठेवले.
थोडक्यात धावफलक:दक्षिण आफ्रिका: १८७/७ (२० षटके) - डेव्हिड मिलर ६३, डेवाल्ड ब्रेविस ४५, ट्रिस्टन स्टब्स ४४; जसप्रीत बुमराह ३/१५, अर्शदीप सिंग २/२८. भारत: १११/१० (१८.५ षटके) - शिवम दुबे ४२, सूर्यकुमार यादव १८; मार्को जानसेन ४/२२, केशव महाराज ३/२४.
