बदलापूर : ठाणे जिल्ह्यातील बदलापूर परिसरात पैश्यांचे आमिष देत महिलांकडून स्त्रीबीज संकलन करून त्यांची अवैध विक्री केल्याचा धक्कादायक प्रकार समोर आला आहे. या प्रकरणी बदलापूर पूर्व पोलिसांनी तीन महिलांना ताब्यात घेतले असून अधिक तपास सुरू आहे.
गुप्त माहितीवरून कारवाई
जोवेली परिसरातील नॅनो सिटी येथील एका सदनिकेत संशयास्पद हालचाली सुरू असल्याची माहिती पोलिसांना मिळाली होती. त्यानंतर बदलापूर पूर्व पोलीस ठाण्याच्या पथकाने बदलापूर ग्रामीण रुग्णालयाच्या मुख्य वैद्यकीय अधिकारी डॉ. सावंत यांच्या उपस्थितीत छापा टाकला. कारवाईदरम्यान बीजोत्सर्जन वाढवण्यासाठी वापरली जाणारी इंजेक्शने आणि वैद्यकीय साहित्य आढळून आले.
महिलांना पैशांचे आमिष
प्राथमिक तपासात समोर आलेल्या माहितीनुसार, आर्थिक अडचणीत असलेल्या महिलांना संपर्क करून त्यांना पैश्याचे आश्वासन दिले जात होते. संबंधित महिलांना स्त्रीबीज वाढवण्याचे इंजेक्शन देण्यात येत होते त्यानंतर महिलांना आयव्हीएफ केंद्रात पाठवून स्त्रीबीज काढून त्यांची विक्री केली जात होती.
मोबाईलमधून धक्कादायक पुरावे
मुख्य आरोपीच्या मोबाईलमध्ये विविध महिलांची कागदपत्रे, कथित बनावट प्रतिज्ञापत्रे, सोनोग्राफी अहवाल, औषधांची माहिती आणि आर्थिक व्यवहारांशी संबंधित छायाचित्रे आढळली आहेत. या आधारे गरजू महिलांचा पुन्हा पुन्हा ‘डोनर’ म्हणून वापर केल्याचा संशय बळावला आहे.
तिघींना अटक, आणखी तपास सुरू
या प्रकरणी सुलक्षणा गाडेकर (४४), अश्विनी चाबुकस्वार (२९) आणि मंजुषा वानखेडे (४६) यांना अटक करण्यात आली आहे. परिमंडळ चार, उल्हासनगरचे पोलिस उपायुक्त यांनी दिलेल्या माहितीनुसार, या रॅकेटमध्ये २० हून अधिक महिलांचा सहभाग असण्याची शक्यता आहे. प्रत्येक महिलेला अंदाजे २५ ते ३० हजार रुपये देण्यात येत होते, अशी माहिती तपासात पुढे आली आहे. या अवैध जाळ्यामागे आणखी कोणी आहे का, याचा शोध घेण्यासाठी पोलिसांकडून सखोल चौकशी सुरू आहे.