आपल्या ताब्यात अनेक पाकिस्तानी सैनिक असल्याचा दावा बलूच लिबरेशन आर्मी म्हणजेच बीएलएने केला आहे. मात्र पाकिस्तानकडून बलूच लिबरेशनचा हा दावा खोटा ठरवण्यात आला आहे.
पाकिस्तानी जवानांकडून मदतीची हाक :
बीएलए ने आपल्या अधिकृत मीडिया विंग ‘हक्कल’ मार्फत एक व्हिडिओ प्रसिद्ध केला आहे. या व्हिडिओमध्ये पाकिस्तानी सैन्याचे आठ जवान कॅमेऱ्यासमोर उभे राहून आपले अधिकृत सेवा ओळखपत्र (सर्व्हिस आयडी) आणि राष्ट्रीय ओळखपत्र दाखवत आहेत. हे सैनिक रडत रडत पाकिस्तानच्या वरिष्ठ अधिकाऱ्यांकडे तात्काळ मदतीची विनंती करताना दिसत आहेत. या आठवड्याच्या सुरुवातीला बीएलए ने पाकिस्तानी सरकारला सात दिवसांचा अल्टिमेटम दिला होता. या कालावधीत कैद्यांच्या अदलाबदलीसाठी चर्चा सुरू झाली नाही, तर बंदिवानांना फाशी देण्याची कठोर चेतावणी देण्यात आली आहे. उपलब्ध माहितीनुसार, ही अंतिम मुदत उद्या म्हणजे २२ फेब्रुवारी रोजी संपत आहे.
बीएलएचे ऑपरेशन हेरोफ :
बीएलए च्या म्हणण्यानुसार, हे सर्व कैदी ‘ऑपरेशन हेरोफ’च्या दुसऱ्या टप्प्यात पकडले गेले होते. काही जणांना त्यांच्या बलूच वांशिक ओळखीच्या आधारे आधीच सोडण्यात आले आहे, कारण ते स्थानिक पोलिसांशी संबंधित होते. मात्र उर्वरित कैदी पाकिस्तानी सैन्याच्या युनिटचे सदस्य असल्याचे सांगितले जात आहे आणि त्यांच्यावर बलूच नॅशनल कोर्टात औपचारिक कारवाई सुरू असल्याचा दावा करण्यात आला आहे.
दरम्यान, पाकिस्तानी सैन्याने हे सर्व दावे फेटाळून लावत म्हटले आहे की आमचा कोणताही सैनिक बेपत्ता नाही किंवा कोणाच्याही ताब्यात नाही. तसेच त्यांनी कैद्यांच्या अदलाबदलीची प्रक्रिया पूर्णपणे नाकारली आहे.
तरीही बीएलए ने तात्काळ चर्चेला सुरुवात करण्याची मागणी पुन्हा केली आहे. अल्टिमेटमची मुदत संपायला केवळ एक दिवस बाकी असल्याचे सांगण्यात आले आहे. ठरलेल्या वेळेत काहीही पाऊल उचलले गेले नाही, तर पाकिस्तानी सैन्याच्या जीवाला धोका निर्माण होऊ शकतो. आतापर्यंत पाकिस्तानी लष्कराकडून आणि शहबाज शरीफ सरकारकडून या व्हिडिओबाबत कोणतीही अधिकृत प्रतिक्रिया आलेली नाही.