मुंबई: आयसीसीच्या टी-२० विश्वचषकात टीम इंडियाची विजयी घोडदौड सुरूच आहे. सलग चार विजयांसह, भारताने सुपर ८ मध्ये थेट प्रवेश केला आहे. आता, ही स्पर्धा एका महत्त्वाच्या टप्प्यावर येऊन ठेपली आहे. यापुढील प्रत्येक सामना त्या-त्या संघासाठी अतिशय महत्वाचा असणार आहे.
दरम्यान, सुपर ८ मध्ये टीम इंडियाचा सामना कधी आणि कोणत्या संघाविरुद्ध होईल ते जाणून आपण जाणून घेऊया. सुपर ८ ग्रुप १ मध्ये भारतासोबत झिम्बाब्वे, वेस्ट इंडिज आणि दक्षिण आफ्रिका हे संघ पोहोचले आहेत. या चारही संघांमधील स्पर्धा अत्यंत रोमांचक होणार आहे.
भारताचा पहिला सामना २२ फेब्रुवारी रोजी दक्षिण आफ्रिकेविरुद्ध अहमदाबादच्या नरेंद्र मोदी स्टेडियमवर सुरू होईल. भारताची सुपर ८ मोहीम हाय-व्होल्टेज मुकाबल्याने सुरू होणार आहे. दक्षिण आफ्रिकेविरुद्धचा हा सामना महत्त्वाचा असेल. अहमदाबादची खेळपट्टी वेगवान गोलंदाजांना अनुकूल असण्याची शक्यता आहे, त्यामुळे सुरुवातीचे षटके निर्णायक ठरू शकतात.
भारताचा दुसरा सुपर ८ सामना झिम्बाब्वेविरुद्ध २६ फेब्रुवारी रोजी चेन्नईतील चिदंबरम स्टेडियमवर खेळला जाणार आहे. भारताच्या फिरकी आक्रमणासाठी ही एक सुवर्णसंधी असू शकते, तर झिम्बाब्वे देखील जोरदार लढाई करण्याचा प्रयत्न करेल. पॉइंट टेबल मजबूत करण्याच्या दृष्टीने हा सामना महत्त्वाचा मानला जातो.
ऐतिहासिक कोलकाता मैदानावर पुन्हा एकदा मोठी लढाई क्रिकेटप्रेमींना पाहायला मिळेल. भारत १ मार्च रोजी कोलकाता येथील ईडन गार्डन्सवर वेस्ट इंडिजविरुद्ध तिसरा सुपर ८ सामना खेळेल. वेस्ट इंडिजच्या स्फोटक फलंदाजीविरुद्ध भारताच्या गोलंदाजीची खरी परीक्षा होईल. गट १ चे चित्र येथे पूर्णपणे स्पष्ट होऊ शकते.
तर इंग्लंड, न्यूझीलंड, पाकिस्तान आणि श्रीलंका गट २ मध्ये आमनेसामने येतील. पाकिस्तान कोलंबो येथील आर. प्रेमदासा स्टेडियमवर न्यूझीलंडविरुद्ध सुपर ८ मोहिमेची सुरुवात करेल.
नॉकआउट टप्प्यातील सामने ४ आणि ५ मार्च रोजी खेळले जातील, अंतिम सामना ८ मार्च रोजी होणार आहे. उपांत्य फेरी आणि अंतिम फेरीसाठी राखीव दिवस देखील ठेवण्यात आले आहेत.
सलग चार विजयांमुळे भारतीय संघाचा आत्मविश्वास वाढला आहे, पण आता खरे आव्हान सुपर ८ मध्ये विजयाची मालिका टिकवून ठेवण्याचे आहे. जर हीच गती कायम राहिली तर भारतासाठी उपांत्य फेरीतील स्थान फार दूर नाही. भारतीय चाहते आता २२ फेब्रुवारीची आतुरतेने वाट पाहत आहेत, जेव्हा टीम इंडिया सुपर ८ मध्ये आपल्या एका नवीन खेळीची सुरुवात करेल.