कराची : पाकिस्तानची आर्थिक राजधानी म्हणून ओळखल्या जाणाऱ्या कराचीत गॅस गळती झाली. या गॅस गळतीची तीव्रता एवढी होती की, मोठा स्फोट झाला. या स्फोटात तीन मजली इमारत पत्त्याच्या बंगल्यासारखी धाडकन कोसळली. इमारत कोसळून चार बालके आणि सहा मुलांसह एकूण १६ जणांचा मृत्यू झाला. तसेच १४ जण जखमी झाले.
सोल्जर बाजार नंबर ३ मधील या इमारतीच्या पहिल्या मजल्यावर बुधवारी रात्री उशिरा गॅस गळतीमुळे स्फोट झाला. स्फोटाचा आवाज एवढा मोठा होता की, भोवतालचा परिसर हादरला. झोपेत असलेल्या रहिवाशांना सावरण्याची संधीही मिळाली नाही. इमारत धाडकन कोसळली. या दुर्घटनेत १० वर्षांच्या चिमुरडीपासून ६० वर्षांच्या वृद्धापर्यंत अनेकांचा मृत्यू झाला. एकूण १६ जणांचा मृत्यू झाला. घटनास्थळी एवढी अरुंद जागा आहे की, मदतकार्यात असंख्य अडचणी येत आहेत. पोलीस आणि मदत पथके घटनास्थळी कार्यरत आहेत. जखमींची प्रकृती चिंताजनक असून मृतांचा आकडा वाढण्याची भीती आहे. ढिगाऱ्याखालून एका १४ वर्षांच्या मुलीला सुखरूप बाहेर काढण्यात यश आले असून तिच्यावर उपचार सुरू आहेत.
स्फोट प्रकरणी चौकशी होईल. स्फोटाचे कारण तपासले जाईल. इमारत अधिकृत होती की नव्हती याचीही तपासणी होणार आहे.
