नागपूर: नागपूर शहरातील दोन तरुण कबड्डीपटूंना बुलेट वरून स्टंटबाजी करणं महागात पडलं आहे. या स्टंटबाजीमुळे दोन्ही खेळाडूंना जागीच आपला जीव गमवावा लागला आहे. या घटनेमुळे शहरात सध्या सर्वत्र काळजी आणि संतापाचं वातावरण आहे.
वर्धा मार्गावरील जनता चौक ते बजाजनगर चौक दरम्यान ही घटना घडली. प्रत्यक्षदर्शींच्या माहितीनुसार, काल रात्री (१६ फेब्रुवारी) सुमारे ११ ते १२ च्या दरम्यान जीटी बुलेटवर स्वार असलेले दोन युवक वारंवार चौकातून वेगात फेऱ्या मारताना दिसत होते. सिग्नलचे पालन न करता त्यांनी दोन वेळा जनता चौक ते बजाजनगर या मार्गावरून सतत स्टंटबाजी केली. विष्णूजी की रसोईसमोरून जात असताना त्यांनी एका महिला दुचाकीस्वाराला कट मारला आणि त्यांचा बुलेटवरील ताबा सुटला आणि बुलेट रस्त्याच्या कडेला उभारण्यात आलेल्या पिलरवर आदळली.
या अपघातात १९ वर्षीय युग विशाल चनकापूरे आणि १९ वर्षीय रुद्र शशिकांत सोमकुंवर, दोघेही रा. काचीपुरा, गंभीर जखमी झाले. नागरिकांनी तत्काळ त्यांना रामदासपेठ येथील खासगी रुग्णालयात दाखल केले; मात्र डॉक्टरांनी दोघांनाही मृत घोषित केले. या घटनेनंतर नागरिकांनी वर्धा मार्गावर रात्रीच्या वेळी विशेष वाहतूक मोहीम राबवण्याची मागणी केली आहे.
