मुंबई: फ्रान्सचे राष्ट्राध्यक्ष इमॅन्युएल मॅक्रॉन सोमवारी रात्री तीन दिवसांच्या भारत दौऱ्यावर प्रथम महिला ब्रिजिट मॅक्रॉन यांच्यासह मुंबईत दाखल झाले आहेत. महाराष्ट्राचे राज्यपाल आचार्य देवव्रत आणि मुख्यमंत्री देवेंद्र फडणवीस यांनी मुंबई विमानतळावर फ्रान्सचे अध्यक्ष आणि प्रथम महिला यांचे स्वागत केले.
त्यानंतर पंतप्रधान नरेंद्र मोदी यांनी मुंबईत फ्रान्सचे अध्यक्ष इमॅन्युएल मॅक्रॉन यांची भेट घेतली. पंतप्रधान मोदी आणि मॅक्रॉन यांच्यातील भेटीचे फोटोही समोर आले आहेत. दोन्ही नेते एकमेकांना हात मिळवताना आणि फोटोशूटसाठी पोझ देताना दिसत आहेत. आज संध्याकाळी, दोन्ही नेते भारत-फ्रान्स इनोव्हेशन इयर २०२६ चे उद्घाटन करतील. यावेळी मोदी आणि मॅक्रॉन उद्योगपती, स्टार्टअप संस्थापक, संशोधन तज्ञ आणि नवोन्मेषी नेत्यांना संबोधित करतील. मॅक्रॉन दिल्ली येथे होणाऱ्या एआय इम्पॅक्ट समिटमध्ये देखील सहभागी होतील.
अध्यक्ष मॅक्रॉन यांच्याकडून २६/११ हल्ल्यातील जवानांना श्रद्धांजली :
पंतप्रधान मोदींची भेट घेण्याआधी अध्यक्ष इमॅन्युएल मॅक्रॉन यांनी मुंबईतील ताजमहाल पॅलेसमध्ये २६/११ हल्ल्यातील जवानांना श्रद्धांजली वाहिली. तर दुसरीकडे, पंतप्रधान मोदींनी एक्स वरून अध्यक्ष मॅक्रॉन यांचे स्वागत केले आणि लिहिले, "भारत तुमच्या भेटीसाठी आणि भारत - फ्रान्स यांच्यातील परस्पर संबंध नवीन उंचीवर नेण्यास मी उत्सुक आहे. मला विश्वास आहे की आपल्या चर्चेमुळे सर्व क्षेत्रांमध्ये सहकार्य आणखी मजबूत होईल आणि जागतिक प्रगतीला हातभार लागेल."
#WATCH मुंबई: प्रधानमंत्री नरेंद्र मोदी ने लोक भवन में फ्रांस के राष्ट्रपति इमैनुएल मैक्रों के साथ द्विपक्षीय बैठक की। (सोर्स: DD) pic.twitter.com/CU0jRhSVbw
— ANI_HindiNews (@AHindinews) February 17, 2026
फ्रान्सचे अध्यक्ष इमॅन्युएल मॅक्रॉन यांचा हा चौथा भारत दौरा आहे. यापूर्वी ते २०१८, २०२३ आणि २०२४ मध्ये भारत दौऱ्यावर आले होते.
भारत आणि फ्रान्समध्ये १९९८ पासून धोरणात्मक भागीदारी आहे आणि दोन्ही देश संरक्षण, तंत्रज्ञान, अवकाश आणि ऊर्जा यासारख्या क्षेत्रात एकत्र काम करत आहेत. या सहकार्याला आणखी बळकटी देण्यासाठीही ही भेट महत्त्वाची मानली जात आहे. पंतप्रधान कार्यालयाच्या (पीएमओ) मते, पंतप्रधान मोदी आणि मॅक्रॉन यांच्यातील चर्चेत भारत-फ्रान्स धोरणात्मक भागीदारी अंतर्गत झालेल्या प्रगतीचा व्यापक आढावा घेतला जाईल.
