पुणे : पुणे आणि कोल्हापूर दरम्यानचा रस्तेप्रवास लवकरच अधिक जलद आणि सुलभ होणार असल्याची माहिती समोर आली आहे. भारतीय राष्ट्रीय महामार्ग प्राधिकरण यांच्या देखरेखीखाली सुरू असलेल्या NH 48 या पुणे–बंगळुरू राष्ट्रीय महामार्गाच्या रुंदीकरण व सुधारणा कामांना वेग आला आहे.
प्रकल्पात कोणते भाग समाविष्ट?
पुणे–सातारा–कराड–कोल्हापूर हा संपूर्ण मार्ग या योजनेत अंतर्भूत आहे. काही ठिकाणी रस्ता चार पदरी, तर काही भागात सहा पदरी करण्यात येत आहे. उड्डाणपूल, सेवा रस्ते आणि भूमिगत मार्ग उभारले जात आहेत. खंबाटकी घाटात नव्या बोगद्याचे काम पूर्ण झाले असून एका दिशेने वाहतूक सुरू करण्यात आली आहे.
पेठ नाका ते कराड या सुमारे २७ किलोमीटरच्या टप्प्याचे काम अदानी रोड इन्फ्रास्ट्रक्चर लिमिटेड या कंपनीकडे आहे. तर पेठ नाका ते कोल्हापूर या सुमारे ४५ किलोमीटरच्या मार्गाची जबाबदारी रोडवेज सोलुशन इंडिया इन्फ्रा लिमिटेड सांभाळत आहे. कराड येथील उड्डाणपूलही लवकरच सुरू होण्याची शक्यता आहे.
केव्हा पूर्ण होणार महामार्ग
बहुतांश कामे शेवटच्या टप्प्यात असून जून २०२६ पर्यंत संपूर्ण प्रकल्प पूर्ण करण्याचे उद्दिष्ट ठेवण्यात आले आहे. केंद्रीय मंत्रीनितीन गडकरी यांच्या पाठपुराव्यामुळे कामांना गती मिळाल्याचे सांगितले जाते. स्थानिक नागरिकांच्या मागणीनुसार काही ठिकाणी अतिरिक्त भूमिगत मार्गांना मान्यता देण्यात आली आहे.
प्रवासाच्या वेळेत घट
सध्या पुणे ते कोल्हापूर प्रवासाला साधारण चार ते पाच तास लागतात. मात्र काम पूर्ण झाल्यानंतर हा कालावधी अंदाजे ३ तासांपर्यंत कमी होण्याची शक्यता आहे. यामुळे वाहनचालकांचा वेळ वाचेल, इंधन खर्चात बचत होईल आणि अपघातप्रवण ठिकाणी सुरक्षितता वाढेल.
