मुंबई : महाराष्ट्र विधानमंडळाच्या २०२६ च्या अर्थसंकल्पीय अधिवेशनाची अधिकृत दिनदर्शिका जाहीर झाली आहे. हे अधिवेशन २३ फेब्रुवारी ते २५ मार्च २०२६ या कालावधीत मुंबई येथील विधानभवनात पार पडणार आहे. राज्याचा अर्थसंकल्प कधी सादर होणार आणि महिनाभर चालणाऱ्या या अधिवेशनात नेमके कोणते महत्त्वाचे टप्पे असतील, याचा सविस्तर तपशील समोर आला आहे.
अधिवेशनाच्या पहिल्या दिवशी, सोमवार, २३ फेब्रुवारी रोजी राज्यपालांच्या अभिभाषणाची प्रत सभागृहाच्या पटलावर ठेवली जाईल, शोक प्रस्ताव मांडले जातील आणि सन २०२५-२०२६ च्या पुरवणी मागण्या सादर केल्या जातील. त्यानंतर २४ आणि २५ फेब्रुवारी रोजी राज्यपालांच्या अभिभाषणावर चर्चा होईल, तर २६ व २७ फेब्रुवारीला पुरवणी मागण्यांवर चर्चा आणि मतदान होऊन २७ फेब्रुवारीला पुरवणी विनियोजन विधेयक मांडले जाईल. २८ फेब्रुवारी रोजी देखील शासकीय कामकाज सुरू राहील.
बंगळुरू : आपल्या दुसऱ्या बाळाच्या आगमनाची तयारी आणि त्या आनंदाचे क्षण कॅमेऱ्यात टिपण्यासाठी आईचं 'मॅटर्निटी फोटोशूट' सुरू होतं. मात्र, याच आनंदाच्या ...
बजेट कधी सादर होणार ?
मार्च महिन्यातील कामकाजाचा विचार करता, १ मार्च (रविवार) आणि २ मार्च रोजी बैठक होणार नाही, तर ३ मार्चला होळीनिमित्त सार्वजनिक सुट्टी असेल. या अधिवेशनातील सर्वात महत्त्वाचा दिवस म्हणजे शुक्रवार, ६ मार्च २०२६ असून, या दिवशी दुपारी २:०० वाजता राज्याचा सन २०२६-२०२७ चा अर्थसंकल्प सादर केला जाईल. त्यानंतर ९ आणि १० मार्च रोजी अर्थसंकल्पावर सर्वसाधारण चर्चा होईल. १ मार्च ते १६ मार्च या कालावधीत अर्थसंकल्पीय मागण्यांवर चर्चा आणि मतदान पार पडेल, ज्यामध्ये १६ मार्च रोजी विनियोजन विधेयक सादर केले जाईल.
अधिवेशनाच्या उत्तरार्धात, १९ मार्चला गुढीपाडव्याची सुट्टी असेल आणि २० मार्चला बैठक होणार नाही. २४ मार्च रोजी अंतिम आठवडा प्रस्ताव मांडला जाईल आणि २५ मार्च रोजी शासकीय कामकाजासह अधिवेशनाची सांगता होण्याची शक्यता आहे. विशेष म्हणजे, या संपूर्ण अधिवेशनात प्रश्नोत्तराच्या तासासाठी मंत्र्यांची पाच गटांत विभागणी करण्यात आली असून, संबंधित दिवशी त्या त्या गटातील मंत्री प्रश्नांना उत्तरे देतील. या नियोजित वेळापत्रकात कामकाजाच्या गरजेनुसार फेरफार होऊ शकतो, असे विधानसभा सचिवालयाचे सचिव जितेंद्र भोळे यांनी १० फेब्रुवारी रोजी प्रसिद्ध केलेल्या पत्रकात नमूद केले आहे.
