महापालिकेच्या गटनेत्यांची नावे केली महापौरांनी जाहीर
मुंबई (विशेष प्रतिनिधी) : मुंबई महापालिकेत अखेर सभागृहनेते आणि विरोधी पक्षनेत्यांची अधिकृत नावे जाहीर झाली. सभागृहनेतेपदी गणेश खणकर आणि विरोधी पक्षनेतेपदी किशोरी पेडणेकर यांच्या नावाची अधिकृत घोषणा महापौर रितू तावडे यांनी सभागृहात केली. याबरोबरच प्रत्येक पक्षाच्या गटनेत्यांच्या नावाचीही अधिकृत घोषणा सभागृहात करण्यात आली.
मुंबई महापालिकेच्या विशेष सभेमध्ये सभागृहनेते आणि विरोधी पक्षनेतेपदाच्या नावाची घोषणा करण्यात आली आहे. सत्ताधारी भाजपच्यावतीने गणेश खणकर यांची गटनेतेपदी निवड करण्यात आली होती. त्यामुळे सभागृहनेतेपदासाठी त्यांच्या नावाची शिफारस पक्षाच्यावतीने करण्यात आली होती. तर उबाठा पक्ष हा विरोधीपक्ष असून या पक्षाच्यावतीने गटनेतेपदी किशोरी पेडणेकर यांची निवड करण्यात आली होती. त्यामुळे सत्ताधारी पक्षाच्या गटनेत्यांची सभागृहनेतेपदी तर विरोधी पक्षाच्या गटनेत्याची विरोधी पक्षनेतेपदी निवड करण्यात येत असल्याचे सभागृहात जाहीर करण्यात आले.
यानंतर शिवसेना पक्षाच्यावतीने अमेय घोले यांची गटनेतेपदी तसेच काँग्रेसच्या गटनेतेपदी अश्रफ आझमी, मनसेच्या गटनेते पदासाठी यशवंत किल्लेदार आणि एमआयएमच्या गटनेतेपदी विजय उबाळे यांच्या नावाची अधिकृत घोषणा महापालिका सभागृहात करण्यात आली. शिवसेनेचे गटनेते अमेय घोले यांच्या नावाची गटनेतेपदी निवड झाल्याचे जाहीर करताच उबाठाच्यावतीने पन्नास खोके, एकदम ओके अशाप्रकारच्या घोषणा देण्यास सुरुवात केली. याला शिवसेनेच्या तृष्णा विश्वासराव यांनी हरकत घेतली. वारंवार या घोषणा आपल्याकडून दिल्या जात असून सभागृहाचे कामकाज चांगल्याप्रकारे चालवणे हे आपले कर्तव्य आहे, पण जर विरोधकांकडून अशाप्रकारच्या घोषणा होत असतील तर खिचडीपासून डेडबॅगपर्यंतचे सर्वच आम्ही बाहेर काढून, मग आम्हाला थांबवायचे नाही असा गर्भित इशारा विश्वासराव यांनी दिला. त्यानंतरही या घोषणा सुरुच राहिल्यामुळे साहेबांचा विजय असो अशाप्रकारच्या घोषणा देण्यास सुरुवात केली.यावर महापौर रितू तावडे यांनी उबाठाच्या नगरसेवकांना समज देत सभागृहाचे काम नीट चालवण्यासाठी सर्वांचे सहकार्य अपेक्षित असल्याचे सांगितले.
