शालेय वस्तूंची जेम पोर्टलवरून करा, नाहीतर डिबिटी करा
मुंबई (विशेष प्रतिनिधी) : मुंबई महापालिकेतील भ्रष्टाचारावर पहिला घाव घालत मुंबई भाजप अध्यक्ष आमदार अमीत साटम यांनी महापालिकेच्या खरेदी प्रणालीत आमूलाग्र बदल करण्याची मागणी केली आहे. महापालिका शाळेतील मुलांना मोफत वितरीत करण्यात येणाऱ्या शालेय वस्तूंची खरेदी केंद्र सरकारच्या जेम पोर्टलवरून त्वरीत व्हावी अशी मागणी आमदार अमीत साटम यांनी महापौर आणि महापालिका आयुक्तांकडे केली आहे. एवढेच नाहीतर महापालिकेने शालेय वस्तू वाटण्याऐवजी डायरेक्ट बेनिफिट ट्रान्सफर (डिबिटी) चाही विचार करावा. त्यामध्ये विद्यार्थ्यांच्या किंवा पालकांच्या बँक खात्यात थेट रक्कम जमा करावी, अशीही सूचना आमदार साटम यांनी या निवेदनाद्वारे केली आहे.
मुंबईच्या नवनिर्वाचित महापौर रितू तावडे आणि आयुक्त भूषण गगराणी यांना लिहिलेल्या पत्रात आमदार अमीत साटम यांनी असे नमूद केले की, अनेक वर्षांपासून महापालिका शालेय विद्यार्थ्यांना गणवेशापासून स्टेशनरीपर्यंत २७ विविध वस्तू मोफत वाटत आहे. सध्या या वस्तू कंत्राटदारांमार्फत खरेदी केल्या जातात. अनेकदा हे कंत्राटदार उत्पादकांकडून वस्तू घेऊन महापालिकेला वाढीव किंमतीत विकत असल्याचे निदर्शनास आल्याचे आमदार अमीत साटम यांनी म्हटले आहे.
भाजप भ्रष्टाचारमुक्त प्रशासन देण्याच्या बांधिलकीचा असल्याचा पुनरुच्चार करत अमित साटम यांनी या २७ वस्तूंची थेट खरेदी केंद्र सरकारच्या जेम पोर्टलवरून करण्याची मागणी केली. तसेच यापुढे शालेय वस्तूंसह जेंडर बजेट अंतर्गत महिलांना वितरित होणाऱ्या सर्व सामग्रीची खरेदीही जेम पोर्टलवरूनच केली जावी. यामुळे महानगरपालिकेच्या निधीची मोठ्या प्रमाणावर बचत होईल, खरेदीमध्ये पारदर्शकता येईल आणि भ्रष्टाचार रोखण्यास मदत होईल. अशा पद्धतीने खरेदी केल्यास वाढीव किंमतीमध्ये महापालिकेस वस्तू देता येणार नाहीत, असे आमदार अमीत साटम यांनी सांगितले.
