बंगळुरू : आपल्या दुसऱ्या बाळाच्या आगमनाची तयारी आणि त्या आनंदाचे क्षण कॅमेऱ्यात टिपण्यासाठी आईचं 'मॅटर्निटी फोटोशूट' सुरू होतं. मात्र, याच आनंदाच्या वातावरणात काळाने घाला घातला आहे. फोटोशूट सुरू असताना ३ वर्षांच्या मुलाचा पाण्याच्या कुंडात (Water Pool) पडून दुर्दैवी मृत्यू झाल्याची धक्कादायक घटना बंगळुरूत घडली आहे.
लक्ष्मीर असं मृत चिमुरड्याचं नाव असून, तो चरण आणि स्वाती यांचा मुलगा होता. मिळालेल्या माहितीनुसार, स्वाती या आठ महिन्यांच्या गरोदर आहेत. शनिवारी त्यांच्या दुसऱ्या बाळाच्या आगमनानिमित्त एका विशेष फोटोशूटचे आयोजन करण्यात आले होते. फोटोशूट सुरू असताना लक्ष्मीर जवळच खेळत होता. खेळता खेळता अचानक त्याचा पाय घसरला आणि तो तिथल्याच एका लहान कृत्रिम पाण्याच्या कुंडात पडला.
मुंबई : 'बिग बॉस'च्या घरातून बाहेर पडल्यानंतरही स्पर्धकांमधील वाद निवळण्याचं नाव घेत नाहीयेत. नुकतेच स्ट्रॉंग स्पर्धक मानले जाणारे आयुष संजीव आणि करण ...
दुर्दैवाची गोष्ट म्हणजे, फोटोशूटमध्ये सर्वजण इतके दंग होते की, लक्ष्मीर पाण्यात पडल्याचे कोणाच्याही लक्षात आले नाही. जेव्हा लोकांचे लक्ष गेले, तेव्हा खूप उशीर झाला होता. लक्ष्मीरला तातडीने रुग्णालयात नेण्यात आले, मात्र डॉक्टरांनी त्याला मृत घोषित केले.
लक्ष्मीरचे वडील चरण हे नोकरीनिमित्त परदेशात होते. ते आज बंगळुरूत परतणार असल्याची माहिती मिळत आहे. ज्या वडिलांच्या स्वागतासाठी लक्ष्मीर उत्सुक होता, त्यांना आता आपल्या मुलाचा मृतदेह पाहावा लागणार आहे. या घटनेमुळे संपूर्ण कुटुंबावर दुःखाचा डोंगर कोसळला आहे. याप्रकरणी पोलिसांनी गुन्हा दाखल केला असून पुढील तपास सुरू केला आहे. फोटोशूटच्या ठिकाणी सुरक्षिततेच्या उपाययोजना होत्या का? आणि हा प्रकार आयोजकांच्या निष्काळजीपणामुळे घडला आहे का? याचा पोलीस शोध घेत आहेत.
