मुंबई: मुंबईचे महापौरआणि उपमहापौर पदाची निवडणूक पार पडल्यानंतर आता सर्वांचे लक्ष सभागृहनेते आणि विरोधी पक्षनेते यांच्या निवडीकडे आहे. या दोन्ही पदांची घोषणा येत्या सोमवारी महापालिका सभागृहात होणार आहे. सभागृहनेत्या आणि विरोधी पक्षनेत्यांच्या नावांच्या घोषणेसह स्थायी समिती, शिक्षण समिती, सुधार समिती आणि बेस्ट समिती सदस्यांचीही नावे जाहीर ली जाणार आहे.
मुंबई महापालिकेत महापौर आणि उपमहापौरपदाच्या निवडणुकीनंतर दुसरी विशेष सभा येत्या सोमवारी १६ फेब्रुवारी रोजी होणार आहे. या विशेष सभेत विरोधी पक्षनेते आणि सभागृहनेते पदाची नावे जाहीर करण्यात आली आहे. सत्ताधारी पक्षाचे गटनेते यांची पर्यायाने सभागृहनेते पदी निवड होते, तर विरोधी पक्षाच्या गटनेत्याची निवड ही विरोधी पक्षनेतेपदी होते. त्यामुळे सत्ताधारी भाजपचे गटनेते गणेश खणकर यांची सभागृहनेते पदी तर विरोधी पक्षाचे म्हणजे उबाठाचे गटनेत्या किशोरी पेडणेकर यांच्या नावाची घोषणा विरोधी पक्षनेतेपदी होणार आहे. दोन्ही पक्षाकडून महापौरांना प्राप्त झालेल्या पत्रानुसार महापौर या दोन्ही गटनेत्यांची अनुक्रमे सभागृहनेते आणि विरोधी पक्षनेते म्हणून नावे जाहीर करणार आहे.
मुंबई महापालिकेत स्थायी, शिक्षण, सुधार आणि बेस्ट या चार वैधानिक समित्या असून या चारही समित्यांवरील नियुक्त सदस्यांची नावे प्रत्येक पक्षाच्या गटनेत्यांकडून प्राप्त झालेल्या पत्रानुसार महापौरांकडून त्यांची घोषणा केली जाणार आहे. त्यामुळे सदस्यांच्या नावाची घोषणा झाल्यानंतर येत्या २० फेब्रुवारी शिक्षण आणि स्थायी समिती अध्यक्षपदाची निवडणूक होईल. यासाठी १८ फेब्रुवारी रोजी दोन्ही समित्यांच्या अध्यक्षपदासाठी उमेदवारी अर्ज महापालिका सचिवांना सादर केले जातील. तर सुधार आणि बेस्ट समिती अध्यक्षांची निवड २३ फेब्रुवारी रोजी होणार आहे. यासाठी २० फेब्रुवारी रोजी या दोन्ही समित्यांच्या अध्यक्षपदासाठीचे उमेदवारी अर्ज सादर केले जातील.
कशाप्रकारे असतील समितीत पक्ष संख्याबळ
स्थायी समिती (२६): (भाजप : १०,शिवसेना :०४,उबाठा :०७, काँग्रेस :०३,मनसे : ०१,एमआयएम :०१)
शिक्षण समिती(२२अधिक ४) : (भाजप : ११,शिवसेना :०४,उबाठा :०७, काँग्रेस :०२,मनसे : ०१,एमआयएम :०१)
सुधार समिती(२६) : (भाजप : १०, शिवसेना :०४,उबाठा :०७, काँग्रेस :०३,मनसे : ०१,एमआयएम :०१)
