कोलंबो : टी-२० विश्वचषकाच्या अटीतटीच्या सामन्यात इंग्लंडने स्कॉटलंडचे आव्हान ५ गडी राखून मोडीत काढले. सलामीवीर आणि कर्णधार स्वस्त परतल्यानंतर टॉम बँटनने (नाबाद ६३) खिंड लढवत इंग्लंडला विजयापर्यंत पोहोचवले. या विजयामुळे इंग्लंडने स्पर्धेत आपली दावेदारी अधिक मजबूत केली आहे.
प्रथम फलंदाजी करताना स्कॉटलंडची सुरुवात अत्यंत खराब झाली. जोफ्रा आर्चरने सुरुवातीलाच धक्के दिल्याने स्कॉटलंडची अवस्था १८/२ अशी झाली होती. कर्णधार रिची बेरिंग्टनने (४९ धावा, ३२ चेंडू) डाव सावरण्याचा प्रयत्न केला, मात्र फिरकीपटू आदिल रशीदने ३६ धावांत ३ बळी घेत स्कॉटलंडच्या मधल्या फळीचे कंबरडे मोडले. शेवटच्या षटकांत ऑलिव्हर डेव्हिडसनने (२०*) केलेल्या फटकेबाजीमुळे स्कॉटलंडला १५२ धावांपर्यंत मजल मारता आली. १५३ धावांच्या लक्ष्याचा पाठलाग करताना इंग्लंडचे दोन्ही सलामीवीर फिल साल्ट (२) आणि जोस बटलर (३) स्वस्तात बाद झाले. १३ धावांवर २ बळी गेल्याने इंग्लंड संकटात होता. मात्र, टॉम बँटनने ४१ चेंडूंत ६३ धावांची नाबाद खेळी करत डावाला आकार दिला. त्याला जॅकब बेथेल (३२) आणि सॅम करन (२८) यांनी मोलाची साथ दिली. अखेरीस विल जॅक्सने (१६) षटकार मारून १८.२ षटकांत इंग्लंडच्या विजयावर शिक्कामोर्तब केले.
स्कॉटलंड विरुद्धच्या विजयामुळे इंग्लंडचा संघ तीन सामन्यांत चार गुणांसह गुणतालिकेत दुसऱ्या स्थानी पोहोचला आहे. त्यांचा शेवटचा सामना इटलीविरुद्ध आहे; तो जिंकल्यास त्यांचे सुपर-८ मधील स्थान जवळपास निश्चित होईल. स्कॉटलंडचे ३ सामन्यांत केवळ २ गुण असून त्यांचा पुढचा प्रवास कठीण झाला आहे. त्यांना आता नेपाळविरुद्धचा शेवटचा सामना जिंकावा लागेल आणि इतर संघांच्या निकालावर अवलंबून राहावे लागेल.
थोडक्यात धावफलक:
स्कॉटलंड: १५२ (१९.४ षटके) (बेरिंग्टन ४९, मायकल जोन्स ३३; आदिल रशीद ३/३६, जोफ्रा आर्चर २/२४)
इंग्लंड: १५५/५ (१८.२ षटके) (टॉम बँटन ६३*, जॅकब बेथेल ३२; ब्रँडन मॅकमुलेन १/२३)
निकाल: इंग्लंड ५ गडी राखून विजयी.