भाजपचे मुंबई अध्यक्ष आमदार अमित साटम यांनी व्यक्त केला निर्धार
मुंबई (विशेष प्रतिनिधी) : आपण सर्वांनी मुंबई महानगराला सतत स्वच्छ आणि सुंदर ठेवायला हवे. यासाठी अभिनेते अक्षय खन्ना यांनी स्वच्छतेच्या स्पर्धेची संकल्पना मांडली. ज्यात अंधेरीची स्पर्धा पार्ल्यासोबत, पार्ल्याची सांताक्रुझसोबत, सांताक्रुझची वांद्र्यासोबत, वांद्रेची माहीमसोबत, माहीमची दादरसोबत आणि दादरची मलबार हिलसोबत अशा प्रकारे एक स्वच्छतेची स्पर्धा आयोजित करा, असे मत त्यांनी मांडले. येणाऱ्या काळात याबाबत नक्कीच विचार करू. मुंबई सध्या स्वच्छ भारतमध्ये ९ व्या क्रमांकावर आहे. लवकरच मुंबईला पहिल्या क्रमांकावर आणण्यासाठी प्रयत्न करू, असा विश्वास भाजपचे मुंबई अध्यक्ष आणि आमदार अमित साटम यांनी व्यक्त केला.
राणीबागेतील पुष्पोत्सवानंतर अंधेरी पुष्पोत्सवाचे शनिवारी १४ फेब्रुवारी २०२६ रोजी अभिनेते, पद्मश्री अक्षय कुमार यांच्या हस्ते उद्घाटन करण्यात आले. जुहू परिसरातील व्ही. एम. मार्गावरील मुंबई महानगरपालिकेच्या पुष्पा नरसी उद्यानात हा दोन दिवसीय उत्सव भरविण्यात आला आहे. शनिवार, १४ फेब्रुवारी आणि रविवार, १५ फेब्रुवारी २०२६ या कालावधीत सकाळी ८ ते रात्री ९ वाजेपर्यंत पुष्पोत्सव सर्व नागरिकांसाठी खुला आहे. या उद्घाटन प्रसंगी बोलतांना आमदार अमित साटम यांनी या भावना व्यक्त केल्या. यावेळी महानगरपालिका आयुक्त भूषण गगराणी, आमदार अमित साटम, आमदार हारुन खान, नगरसेविका सुधा सिंह, नगरसेवक दीपक कोतेकर, नगरसेवक रोहन राठोड, नगरसेवक अनिश मकवानी, नगरसेविका सुनिता मेहता, नगरसेवक विठ्ठल बंदेरी, नगरसेवक रुपेश सावरकर, नगरसेविका सायली कुलकर्णी, उप आयुक्त (परिमंडळ ४) भाग्यश्री कापसे, के पश्चिम विभागाचे सहायक आयुक्त चक्रपाणी अल्ले, महानगरपालिका उद्यान अधीक्षक जितेंद्र परदेशी व विविध मान्यवर उपस्थित होते.
या पुष्पोत्सवात तुम्ही काय पहाल ?
अंधेरीतील पहिल्या पुष्पोत्सवाला स्थानिक नागरिक, महानगरपालिका शाळेचे विद्यार्थी-विद्यार्थिनी, तरुण, ज्येष्ठ नागरिक आदी भेट देत वैविध्यपूर्ण रंगीत फुलांनी साकारलेली संगीत क्षेत्रातील वाद्यांच्या प्रतिकृती…फुलांनी सजविलेले मोर-फुलपाखरू, हत्ती-घोडे आणि सनई-चौघडे, तुतारी…बहरलेली फुलझाडे…आश्चर्यचकीत करणारी पिटुनिया, ब्रोकोली, साल्विया वनस्पती…झेंडू, गुलाब, मोगरा आदींसह मनमोहून टाकणारी सुगंधी फुलांची सजावट…औषधी वनस्पती…वेली, भाजीपाला… आणि या सर्वांसाठी खते, कुंड्या अशाप्रकारे यामध्ये ठेवण्यात आल्या आहेत.
अंधेरी पुष्पोत्सवात रंगीबेरंगी फुलांच्या सजावट करण्यात आली आहे. तसेच बागेसाठी झाडे, कुंड्या, खते, उद्यानातील अवजारे, विविध रोपे व झाडांची नर्सरी, फुलांपासून बनवलेली औषधे, कीटकनाशके, फवारणी यंत्रे, खते आदी दालनेही आहेत. यासोबतच वेगवेगळ्या बोन्साय प्रजाती, शोभेच्या वनस्पती, फुले, भाज्या, औषधी वनस्पतीही प्रदर्शनात ठेवण्यात आल्या आहेत.
