मुंबई : बिग बॉस मराठी’मधून बाहेर पडल्यानंतर स्पर्धक दिव्या शिंदेने निर्मात्यांवर गंभीर आरोप करत कायदेशीर कारवाईचा इशारा दिला आहे. शोदरम्यान घडलेल्या वादानंतर तिला बाहेरचा मार्ग दाखवण्यात आला होता. मात्र, घराबाहेर आल्यानंतर तिने पत्रकार परिषदेत आपली भूमिका मांडत बिग बॉस च्या प्रसारित करण्यात आलेल्या काही भागांविषयी प्रश्न उपस्थित केले.
दिव्या शिंदेचा आरोप आहे की, प्रेक्षकांसमोर तिची केवळ आक्रमक बाजू दाखवण्यात आली, तर त्या प्रसंगांआधी काय घडले होते हे प्रसारित करण्यात आले नाही. “पूर्ण फुटेज जाहीर करण्यात यावे,” अशी तिची मागणी असून, अन्यथा पुढील पावले उचलण्याचा इशारा तिने दिला आहे.
नेमकं काय घडलं?
एका टास्कदरम्यान झालेल्या वादानंतर दिव्याने सहस्पर्धकांना उद्देशून केलेल्या वक्तव्यावर आक्षेप घेतला गेला. तिच्या बोलण्यातून धमकीचा अर्थ निघाल्याचा आरोप इतर स्पर्धकांनी आणि बिग बॉस या शोद्वारे करण्यात आला. त्यानंतर कार्यक्रम व्यवस्थापनाने कारवाई करत तिला शोमधून तात्काळ बाहेर काढले.
दिव्याची भूमिका
आपल्या वक्तव्याचा गैरसमज झाल्याचे दिव्याने स्पष्ट केले आहे. तिच्या मते, तिच्या विधानाचा अर्थ प्रत्यक्ष हिंसेशी जोडणे चुकीचे आहे. तसेच तिने स्वतः कार्यक्रम सोडण्याची इच्छा व्यक्त केली होती, असा दावा देखील तिने केला आहे.
दरम्यान, या आरोपांवर शोच्या निर्मात्यांकडून अधिकृत प्रतिक्रिया अद्याप समोर आलेली नाही. संपूर्ण प्रकरणामुळे रिअॅलिटी शोमधील संपादन प्रक्रियेवर आणि पडद्यामागील घडामोडींवर चर्चा सुरू झाली आहे.
