कोलंबो : टी-२० विश्वचषक २०२६ मध्ये जेतेपदाचे स्वप्न पाहणाऱ्या श्रीलंकन संघाला मोठा धक्का बसला आहे. संघाचा मुख्य फिरकीपटू आणि मॅचविनर खेळाडू वानिंदू हसरंगा हॅमस्ट्रिंगच्या गंभीर दुखापतीमुळे संपूर्ण स्पर्धेतून बाहेर पडला आहे. आयसीसीच्या तांत्रिक समितीने त्याच्या जागी अष्टपैलू दुशान हेमनथा याच्या नावावर शिक्कामोर्तब केले आहे. आयर्लंडविरुद्धच्या सलामीच्या सामन्यात गोलंदाजी करताना हसरंगाच्या डाव्या पायाचे स्नायू दुखावले होते. प्रचंड वेदना होत असूनही त्याने मैदान सोडले नाही आणि ४ षटकांत २५ धावा देत ३ महत्त्वाचे बळी टिपले. मात्र, सोमवारी झालेल्या एमआरआय रिपोर्टमध्ये त्याच्या स्नायूंना गंभीर इजा झाल्याचे स्पष्ट झाले. डॉक्टरांनी त्याला किमान ४ ते ६ आठवडे विश्रांतीचा सल्ला दिला आहे. हसरंगाची उणीव भरून काढण्यासाठी ३१ वर्षीय लेग-स्पिनर दुशान हेमनथा याला तातडीने पाचारण करण्यात आले आहे. हेमनथाने आतापर्यंत ५ एकदिवसीय आणि ३ टी-२० आंतरराष्ट्रीय सामन्यांत श्रीलंकेचे प्रतिनिधित्व केले आहे. घरगुती क्रिकेटमधील त्याच्या सातत्यपूर्ण कामगिरीमुळे त्याला ही मोठी संधी मिळाली आहे. केवळ श्रीलंकाच नव्हे, तर न्यूझीलंड संघालाही दुखापतीचा फटका बसला आहे. किवी संघाचा अष्टपैलू खेळाडू मायकेल ब्रेसवेल पायाच्या दुखापतीमुळे स्पर्धेतून बाहेर गेला आहे. न्यूझीलंडने अद्याप त्याच्या बदली खेळाडूची घोषणा केलेली नाही. तसेच हसरंगाच्या अनुपस्थितीत श्रीलंका गुरुवारी ओमान विरुद्ध मैदानात उतरणार आहे. हसरंगा हा केवळ गोलंदाज नसून खालच्या क्रमांकावर उपयुक्त फलंदाजीही करतो, त्यामुळे त्याची जागा भरून काढण्याचे मोठे आव्हान आता दुशान हेमनथा आणि कर्णधारासमोर असेल.
