हरियाणा: हरियाणाच्या फरिदाबादमध्ये सुरू असलेल्या प्रसिद्ध सूरजकुंड मेळ्यात एक मोठा अपघात घडला आहे. मेळ्यातील एक मोठा त्सुनामी नामक झुला अचानक कोसळल्याने मोठा अपघात होऊन यात अनेक लोक जखमी झाले आहे. दरम्यान या अपघातात झुल्याखाली अडकलेल्यांना वाचवण्यासाठी पोहोचलेल्या एका पोलीस निरीक्षकासह दहाहुन अधिक लोक जखमी झाले. जखमी निरीक्षकाला गंभीर दुखापत झाली असून त्यात त्यांचा मृत्यू झाल्याचीही माहिती आहे.
पलवल येथे तैनात असलेले पोलीस निरीक्षक जगदीश प्रसाद यांचा बचाव कार्यादरम्यान मृत्यू झाला आहे. पोलिस उपायुक्त (डीसी) आयुष सिंह यांनी सांगितले की, या अपघातात एकूण १३ लोक जखमी झाले आहेत, त्यापैकी एकाचा मृत्यू झाला. संध्याकाळी ६.१५ च्या सुमारास हा झुला कोसळला असून अचानक घडलेल्या या घटनेने परिसरात एकच खळबळ उडालीआहे.
दरम्यान, जिल्हा उपायुक्त, पर्यटन विभागाचे व्यवस्थापकीय संचालक आणि वरिष्ठ पोलिस अधिकारी घटनास्थळी पोहोचले. अपघातानंतर परिसरात नाकाबंदी करण्यात आली. महत्वाचे म्हणजे यापूर्वी देखील या ठिकाणी फूड कोर्टमध्ये एक गेट कोसळल्याने एक अपघात झाला होता, ज्यामध्ये दोन लोक जखमी झाले होते.
सूरजकुंड मेळ्यात एकाच दिवशी दोन अपघातांची नोंद
दरम्यान शनिवारी 7 फेब्रुवारी रोजी सूरजकुंड मेळ्यात दोन अपघातांची नोंद झाली असून त्यात अनेक लोक जखमी झाले. पहिला अपघात गेट कोसळल्याने झाला, तर दुसरा त्सुनामी झुला कोसळल्याने झाल्याचे वृत्त आहे. या दोन्ही अपघातांमुळे जत्रा समिती आणि आयोजकांच्या भूमिकेवर प्रश्नचिन्ह उपस्थित झाले आहे. पहिल्या अपघातात एका मुलाला किरकोळ दुखापत झाली, तर एका तरुणाला रुग्णालयात नेण्यात आले आणि आता त्याला घरी सोडण्यात आले आहे. या जत्रेत अनेक सांस्कृतिक कार्यक्रम सुरू होते. झूला कोसळल्याने परिसरात गोंधळ उडाला. लोक जीव वाचवण्यासाठी धावताना दिसले. घटनेची माहिती मिळताच वरिष्ठ पोलिस अधिकारी घटनास्थळी पोहोचले.
अपघातानंतर बचावकार्य करण्यासाठी प्रशासनाकडून अनेक पथके तैनात करण्यात आली आहेत. झूल्याखाली अडकलेल्यांना बाहेर काढण्यासाठी तातडीने प्रयत्न केले जात आहेत. पोलिसांनी लोकांना घटनास्थळावरून दूर जाण्याच्या सूचनाही दिल्या आहेत. पोलीस प्रशासनाने घटनेची चौकशी सुरू केली आहे. प्रशासनाने आयोजकांच्या भूमिकेची चौकशी सुरू असल्याचे सांगितले आहे. पोलिसांनी दोषी आढळणाऱ्यांवर कठोर कारवाई केली जाईल.
