बल्गेरिया : भाकितांसाठी ओळखल्या जाणाऱ्या बल्गेरियन द्रष्ट्या बाबा वेंगा पुन्हा एकदा चर्चेत आल्या आहेत. भूतकाळातील काही घटनांशी त्यांच्या कथित भविष्यवाण्यांची सांगड घातली जात असल्याने, आजही अनेक जण त्यांच्या भाकितांकडे उत्सुकतेने पाहतात. सध्या वाढत्या सोने आणि चांदीच्या किमतींच्या पार्श्वभूमीवर बाबा वेंगांच्या एका जुन्या भाकितांचा पुन्हा उल्लेख केला जात आहे.
मिळालेल्या माहितीनुसार, २०१६ मध्ये करण्यात आलेल्या एका कथित भविष्यवाणीत जागतिक आर्थिक अस्थिरतेमुळे सोने, चांदी आणि तांबे यांसारख्या मौल्यवान धातूंमध्ये गुंतवणूक वाढू शकते, असा संकेत देण्यात आला होता. या अस्थिरतेचा परिणाम कागदी चलनांच्या विश्वासार्हतेवर होईल आणि लोक सुरक्षित पर्यायांकडे वळतील, असा दावा या भाकितांमध्ये करण्यात आला आहे.
चलनांवरील विश्वास कमी होण्याचा दावा
या भाकितांनुसार, डॉलर, रुपया, येन, युआन यांसारख्या कागदी चलनांचे मूल्य कमी होऊ शकते. त्यामुळे नोटांवरील विश्वास कमी होऊन लोक सोने, चांदीसारख्या मौल्यवान धातूंना सुरक्षित गुंतवणूक मानतील, असा दावा केला जातो. परिणामी, या धातूंच्या मागणीत वाढ होऊ शकते.
भविष्यवाणी विरुद्ध तज्ज्ञांचे मत
दरम्यान, आर्थिक तज्ज्ञ आणि बाजार विश्लेषक या दाव्यांकडे वेगळ्या दृष्टीने पाहतात. तज्ज्ञांच्या मते, सध्याच्या काळात सोने आणि चांदीच्या किमती वाढण्यामागे जागतिक, राजकीय तणाव, महागाईची भीती, डॉलरमधील चढउतार आणि औद्योगिक मागणी ही प्रमुख कारणे आहेत. या वाढीचा थेट संबंध कोणत्याही भविष्यवाणीशी जोडता येत नाही
काही बाजार विश्लेषकांच्या अंदाजानुसार, चालू वर्षाच्या अखेरीस सोने नवीन उच्चांक गाठण्याची शक्यता नाकारता येत नाही. तर औद्योगिक वापरामुळे तांब्याची मागणीही मजबूत राहू शकते.
बाबा वेंगाचं भाकितं चर्चेचा विषय ठरत असला , तरी गुंतवणुकीचे निर्णय केवळ अशा दाव्यांवर आधारित न करता आर्थिक परिस्थिती, बाजारातील ट्रेंड आणि तज्ज्ञांच्या सल्ल्याचा विचार करूनच घ्यावेत, असं अर्थतज्ज्ञांकडून सांगण्यात येत आहे.
