मुंबई: आयसीसी पुरुष T२० विश्वचषक २०२६ ची आजपासून (शनिवार, ७ फेब्रुवारी) सुरुवात होणार आहे. ही स्पर्धा सुरु होण्याआधीच भारतीय संघाला मोठा झटका बसला आहे. स्टार खेळाडू हर्षित राणा अनफिट असल्याची माहिती समोर आली आहे. ऑलराऊंडर हर्षित राणा दुखापतग्रस्त झाल्याने तो या स्पर्धेतून बाद झाला आहे.
मोहम्मद सिराजला संधी:
हर्षित राणाला दक्षिण आफ्रिकेविरुद्धच्या सराव सामन्यात दुखापत झाली होती, ज्यानंतर मेडिकल टीमने त्याला अनफिट घोषित केले. बीसीसीआयने प्रसिद्ध केलेल्या पत्रकात म्हटले आहे की, स्कॅन रिपोर्टनुसार राणा या टूर्नामेंटमध्ये खेळू शकणार नाही. त्याच्या जागी आता मोहम्मद सिराज भारतीय पेस अटॅकची धुरा सांभाळताना दिसेल. यामुळे बॉलिंग लाईनअपमध्ये मोठे फेरबदल करण्यात आले आहेत.
कर्णधारपदी सूर्यकुमार यादव:
भारतीय क्रिकेट नियामक मंडळाने (BCCI) अपेक्षेप्रमाणे सूर्यकुमार यादव याच्याकडे कर्णधारपद सोपवले आहे. भारतीय संघात अभिषेक शर्मा, टिळक वर्मा आणि रिंकू सिंह यांसारख्या आक्रमक फलंदाजांना स्थान मिळाले आहे, तर यष्टीरक्षणाची जबाबदारी संजू सॅमसन आणि ईशान किशन यांच्यावर असेल. हार्दिक पंड्या अष्टपैलू खेळाडू म्हणून कणा असेल, तर गोलंदाजीची धुरा जसप्रीत बुमराह, अर्शदीप सिंह आणि कुलदीप यादव सांभाळतील.
भारत आणि अमेरिका (T20 World Cup 2026) यांच्यातील ही महत्त्वाची लढत शनिवारी मुंबईच्या वानखेडे स्टेडियमवर संध्याकाळी ७ वाजता सुरु होणार आहे.
ऑस्ट्रेलियाला दुखापतीचा फटका:
अंतिम संघ जाहीर करण्याच्या शेवटच्या दिवशी ऑस्ट्रेलियाला मोठा धक्का बसला आहे. स्टार अष्टपैलू पॅट कमिन्स आणि मॅथ्यू शॉर्ट हे दुखापतीमुळे या विश्वचषकातून बाहेर पडले आहेत. त्यांच्या अनुपस्थितीत मिचेल मार्शच्या नेतृत्वाखालील ऑस्ट्रेलियन संघाला आपली रणनीती बदलावी लागणार आहे.