कोलंबो : टी-२० विश्वचषकाच्या सलामीच्या सामन्यात फहीम अश्रफच्या तुफानी फलंदाजीच्या जोरावर पाकिस्तानने नेदरलँडचे आव्हान ३ गडी राखून मोडीत काढले. ११४ धावांवर ७ गडी गमावलेला पाकिस्तान संघ संकटात असताना फहीमने केवळ ११ चेंडूत २९ धावा कुटून पाकिस्तानला अशक्य वाटणारा विजय मिळवून दिला.
प्रथम फलंदाजी करणाऱ्या नेदरलँडची सुरुवात आक्रमक झाली. मायकल लेविटने (२४) डावाला गती दिली, तर कर्णधार स्कॉट एडवर्ड्स (३७) आणि बास डी लीडे (३०) यांनी मधल्या फळीत महत्त्वाची भूमिका बजावली. मात्र, पाकिस्तानच्या फिरकीपटूंनी सामन्यावर नियंत्रण मिळवले. अबरार अहमद (२/२३) आणि सईम अयुब (२/७) यांनी मधल्या फळीला धक्के दिले, तर सलमान मिर्झाने (३/२४) तळाच्या फलंदाजांना बाद करून नेदरलँडचा डाव १४७ धावांवर रोखला.
१४८ धावांच्या लक्ष्याचा पाठलाग करताना पाकिस्तानची सुरुवात चांगली झाली. सलामीवीर साहिबजादा फरहानने (४७ धावा, ३१ चेंडू) एका बाजूने किल्ला लढवला. मात्र, ९८ धावांवर फरहान बाद झाला आणि त्यानंतर पाकिस्तानच्या डावाला गळती लागली. बाबर आझम (१५) आणि शादाब खान (८) स्वस्तात परतल्याने पाकिस्तानची अवस्था ७ बाद ११४ अशी अत्यंत नाजूक झाली होती.
शेवटच्या काही षटकांत पाकिस्तानला विजयासाठी मोठी धावसंख्या हवी होती. आठव्या क्रमांकावर आलेल्या फहीम अश्रफने डच गोलंदाजीची पिसं काढली. त्याने केवळ ११ चेंडूंत २ चौकार आणि ३ उत्तुंग षटकार खेचत २६३ च्या स्ट्राईक रेटने नाबाद २९ धावा केल्या. त्याच्या या स्फोटक खेळीमुळे पाकिस्तानने १९.३ षटकांत विजय साकारला. या विजयानंतर पाकिस्तानचा आत्मविश्वास उंचावला आहे.