मुंबई (विशेष प्रतिनिधी) : मुंबई महानगरपालिकेतील भाजपा पक्ष कार्यालयाचे उद्घाटन शुक्रवारी, ६ फेब्रुवारी २०२६ रोजी सकाळी १०.०० वाजता करण्यात आले. सुमारे पावणे चार वर्षांच्या प्रशासकीय राजवटीनंतर हे कार्यालय पुन्हा एकदा राजकीय हालचालींसाठी खुले झाले आहे. मुंबई महापालिका गटनेते गणेश खणकर यांच्या उपस्थितीत हा उद्घाटन समारंभ विधिवत वस्तू पूजन करून पार पडले.
महापालिका पक्ष कार्यालय उद्घाटन कार्यक्रमाप्रसंगी नवनिर्वाचित नगरसेवकांनी पारंपारिक मराठी पेहराव केला होता. कार्यालयात सत्यनारायणाची पूजा आणि विधिवत पूजन करून नवीन सत्ताकाळाचा शुभारंभ करण्यात आला. मुंबई महानगरपालिकेतील भाजपच्या आगामी काळातील वाटचालीचा हा नवा अध्याय मानला जात आहे. ही एका नव्या पर्वाची सुरुवात आहे.
या प्रसंगी कार्यालयाबाहेर मुख्यमंत्री देवेंद्र फडणवीस यांची भव्य रांगोळी काढण्यात आली होती आणि त्यावर "मुंबईच्या सुवर्णकाळाची सुरुवात" असा संदेश देण्यात आला होता. कार्यालयाच्या उद्घाटनाच्या वेळी महानगरपालिका निवडणूकीत निवडून आलेले सर्व नगरसेवक आणि नगरसेविका उपस्थित होते.
नुकत्याच झालेल्या महापालिका निवडणुकीनंतर भाजपाने पक्ष कार्यालय ताब्यात घेतले असून, येत्या ११ फेब्रुवारी २०२६ रोजी होणाऱ्या महापौर आणि उपमहापौर पदाच्या निवडणुकीसाठी पक्षाची रणनीती या कार्यालयातूनच आखण्यास सुरुवात केली आहे. विशेष म्हणजे मुंबईत भाजपचे नेतृत्व करणारे आणि ज्यांच्या नेतृत्वाची ८९ नगरसेवक निवडून आले. ते मुंबई भाजप अध्यक्ष अमित साटम हे या कार्यक्रमाला अनुपस्थित राहिले. मुंबई अध्यक्ष अमित साटम हे नव्या कार्यालयाच्या पूजेला उपस्थित न राहिल्याने हा चर्चेचा विषय ठरला होता.
