मुंबई : खऱ्या मित्रांसोबत केलेला प्रवास हा केवळ ठिकाणं बदलण्यासाठी नसतो, तर तो स्वतःला शोधण्यासाठी आणि नाती अधिक घट्ट करण्यासाठी असतो. मैत्रीचा हाच हळुवार आणि तितकाच स्वछंदी प्रवास मोठ्या पडद्यावर मांडण्यासाठी 'सखे गं साजणी' हा चित्रपट सज्ज झाला आहे. नुकतंच या चित्रपटाचं 'कूल' पोस्टर प्रदर्शित करण्यात आलं असून, सोशल मीडियावर त्याची जोरदार चर्चा सुरू झाली आहे.
मुंबई : चित्रपटसृष्टीत नेहमीच बंदिवास आणि सामाजिक नियंत्रणाच्या कथा प्रभावीपणे मांडल्या गेल्या आहेत. याच पार्श्वभूमीवर एक नवा वास्तववादी चित्रपट ...
मराठीतील लोकप्रिय त्रिकूट पहिल्यांदाच एकत्र
या चित्रपटाचं सर्वात मोठं आकर्षण म्हणजे याची तगडी स्टारकास्ट. मराठी सिनेसृष्टीतील ग्लॅमरस अभिनेत्री प्रार्थना बेहेरे, सौंदर्याची खाण पूजा सावंत आणि आपल्या अभिनयाने प्रेक्षकांच्या मनावर राज्य करणारा अभिनेता अभिजीत खांडकेकर हे तीन लोकप्रिय चेहरे या चित्रपटात मुख्य भूमिकेत दिसणार आहेत. प्रदर्शित झालेल्या पोस्टरमध्ये हे तिघेही निरभ्र आकाशाकडे पाहत आयुष्याचा आनंद लुटताना दिसत आहेत. त्यांचा हा 'कूल' आणि 'ट्रेंडी' अंदाज तरुणाईला आकर्षित करणारा ठरत आहे. 'सखे गं साजणी' ही गोष्ट आहे तीन मित्रांच्या प्रवासाची. पोस्टरवरून हे स्पष्ट होतंय की, हा चित्रपट केवळ फिरण्यावर आधारित नसून, मैत्रीची एक नवी व्याख्या आणि आयुष्य नव्याने जगण्याची उर्मी देणारा ठरणार आहे. तिघांच्या चेहऱ्यावरील हास्य आणि पोस्टरची मांडणी पाहून प्रेक्षकांमध्ये चित्रपटाबाबतची उत्सुकता शिगेला पोहोचली आहे.
बड्या निर्मिती संस्थेची धुरा
अभिनेत्री प्रार्थना बेहेरे आणि निर्माते-दिग्दर्शक अभिषेक जावकर यांच्या 'रेडबल्ब स्टुडिओ' (Redbulb Studios) मार्फत या चित्रपटाची निर्मिती करण्यात आली आहे. चित्रपटाच्या दिग्दर्शनाची जबाबदारी खुद्द अभिषेक जावकर यांनीच सांभाळली आहे. विशेष म्हणजे, अभिनेता अभिजीत खांडकेकर याने अभिनयासोबतच या चित्रपटाच्या निर्मितीमध्येही सहभाग नोंदवला आहे. त्यांच्यासोबत आदित्य वासुदेव घरत, श्रेयश विलास सावंत यांनी निर्मितीची धुरा सांभाळली आहे, तर अभिषेक दिलीप वाकचौरे आणि जतीन उपाध्याय हे सहनिर्माते म्हणून जोडले गेले आहेत.
प्रदर्शित कधी होणार ?
पोस्टर पाहून हा चित्रपट मैत्रीची नव्याने ओळख करून देणार असल्याचं दिसतंय. तसेच 'सखे गं साजणी' हा चित्रपट ३ एप्रिल २०२६ रोजी मोठ्या पडद्यावर झळकणार असल्याचे घोषित केले गेले आहे. अर्थात पोस्टर पाहून प्रेक्षकांमध्ये उत्सुकता वाढली आहे.
