जालना: जालना जिल्ह्यातील एक धक्कादायक प्रकार समोर आला आहे. भोकरदन तालुक्यामध्ये एका अज्ञात महिलेने हॉटेलसमोर उघडपणे कथित स्वरुपात काळी जादू केल्याने परिसरात खळबळ उडाली आहे. या घटनेचं सीसीटीव्ही फुटेज समोर आलं आहे. हा संपूर्ण प्रकार जावखेडा ठोंबरे गावातील 'शिवनेरी हॉटेल' येथे घडला आहे.
या सीसीटीव्ही फुटेजमध्ये चेहरा झाकलेली एक महिला दिसत आहे. घटनास्थळी हळद, कुंकू, लिंबू, बाहुली तसेच काही संशयास्पद साहित्य आढळून आलं आहे. सर्वात धक्कादायक बाब म्हणजे गावातील प्रतिष्ठित नागरिकांची तसेच काही पोलीस कर्मचाऱ्यांची नावं लिहिलेल्या अनेक चिठ्ठ्याही सापडल्या आहेत. 30 जानेवारी रोजी ही घटना घडली असून घटनेने गावात दहशत आणि तणावाचं वातावरण निर्माण झालं आहे.
हॉटेलबाहेर संशयास्पद साहित्य आढळलं
हॉटेलचे मालक कृष्णा भानुदास ठोंबरे यांनी नेहमीप्रमाणे 30 जानेवारी रोजी रात्री 10 वाजता हॉटेल बंद केले. मात्र दुसऱ्या दिवशी सकाळी कर्मचारी कामावर आले असता, हॉटेलच्या मुख्य दरवाज्या समोरील दृश्य पाहून त्यांना धक्का बसला. हॉटेलसमोर हळद, कुंकू, लिंबू, बाहुली आणि काही संशयास्पद साहित्य पडलेले होते. त्याहूनही अधिक धक्कादायक बाब म्हणजे तेथे गावातील प्रतिष्ठित नागरिक आणि काही पोलीस कर्मचाऱ्यांची नावे लिहिलेल्या अनेक चिठ्ठ्या आढळून आल्या.
संशयास्पद प्रकरण वाटल्याने हॉटेलच्या सीसीटीव्ही फुटेजची तपासणी करण्यात आली. त्यानंतर संपूर्ण सत्य समोर आले. सीसीटीव्ही फुटेजमध्ये दिसतंय की, एक अज्ञात महिला ऑटो-रिक्षातून हॉटेलबाहेर पोहोचली. तिने चेहऱ्यावर मास्क लावलेला होता. संबंधित महिला हॉटेलसमोर लिंबू, हळद-कुंकू यासारख्या गोष्टी ठेवताना दिसत आहे. या घटनेनंतर हॉटेल मालक कृष्णा ठोंबरे यांनी तातडीने भोकरदन पोलीस ठाण्यात तक्रार दाखल केली. पोलिसांनी अज्ञात महिलेविरुद्ध गुन्हा दाखल केला असून आरोपी महिलेचा शोध घेण्याचा प्रयत्न करत आहेत.
