मुंबई: मुंबई महापालिकेच्या महापौरपदाबाबतची उत्सुकात शिगेला पोहोचली आहे. त्यामुळे आता राजकीय हालचालींना वेग आला आहे. याच पार्श्वभूमीवर शिंदेंच्या शिवसेना गटाकडून उपमहापौर पदासाठी दोन महिला नगरसेविकांच्या नावाची चर्चा सुरु झाली आहे.
मिळालेल्या माहितीनुसार; शिंदे गटाकडून उपमहापौरपदासाठी तृष्णा विश्वासराव आणि यामिनी जाधव यांच्या नावाची जोरदार चर्चा सुरु आहे. २०१४ ला तृष्णा विश्वासराव या सभागृह नेत्या होत्या, तर त्याचवेळी महापौरपद हे अनुसूचित जाती जमातीसाठी आरक्षित असताना महापौर पदासाठी यामिनी जाधव यांचेही नाव चर्चेत होते. आता उपमहापौरपदी उपमुख्यमंत्री एकनाथ शिंदे कोणाची नेमणूक करतात हे पाहणे महत्वाचे ठरणार आहे.
शनिवार ७ फेब्रुवारी रोजी महापौरपदासाठी अर्ज स्विकारले जाणार:
शनिवार ७ फेब्रुवारी रोजी महापौरपदासाठी अर्ज स्विकारले जाणार आहेत. तर बुधवार ११ फेब्रुवारीला मुंबई महापालिकेच्या महापौरपदाची घोषणा करण्यात येणार आहे. त्याच दिवशी म्हणजेच ११ फेब्रुवारी रोजीच दुपारी १२ वाजता विशेष सभेचं आयोजन करण्यात आलं असून महापौरपादासाठी अर्ज मागे घेण्याची वेळ सभागृह भरण्याच्या १५ मिनिटं आधी असणार आहे.
८९ नगरसेवकांची स्वतंत्र गटनोंदणी :
सोमवार २ फेब्रुवारी रोजी कोकण भवनात भाजपच्या एकूण ८९ नगरसेवकांची स्वतंत्र गटनोंदणी झाली. तर शिवसेना आणि राष्ट्रवादी काँग्रेसच्या नगरसेवकांची एकत्र गटनोंदणी झाली. त्यामुळे महायुतीच्या नगरसेवकांची एकूण संख्या १२१ वर पोहोचली आहे.
