वाशी : धावत्या लोकलमधून प्रवाशाने वाशीच्या खाडीत उडी मारली. ही धक्कादायक घटना नवी मुंबईतील वाशी खाडी परिसरात गुरुवार पाच फेब्रुवारी २०२६ रोजी दुपारी घडली. तरुण प्रवाशाने लोकलमधून वाशीच्या खाडीत उडी मारल्याचे लक्षात येताच प्रवाशांमध्ये गोंधळाचे वातावरण निर्माण झाले. काही प्रवाशांना आरडाओरडा केला. खाडीत उडी मारणाऱ्या तरुणाचा जीव मच्छीमारांनी जीवाची बाजी लावून वाचवला.
हाती आलेल्या माहितीनुसार, लोकल छत्रपती शिवाजी महाराज टर्मिनस येथून पनवेलच्या दिशेने जात होती. या गाडीमध्ये भारत शिवराम फुळमाळी नावाचा तरुण होता. लोकल वाशीच्या खाडीवरून जात होती त्यावेळी तरुणाने वेगाने हालचाल केली आणि थेट वाशीच्या खाडीत उडी मारली. पण मच्छीमारांनी जीवाची बाजी लावून भारत शिवराम फुळमाळी याला वाचवले. भारतने आत्महत्या करण्याचा प्रयत्न का केला, याचे कारण अद्याप समजलेले नाही.
भारतच्या खिशात एक ओळखपत्र सापडले. या ओळखपत्रावरून तो पोलीस मित्र असल्याचे कळले. भारत हा अहिल्यानगरच्या पार्थडी तालुक्यातील आंबिकानगरचा रहिवासी आहे. भारतने केलेल्या कृतीप्रकरणी पोलीस तपास सुरू आहे.
हार्बरची वाहतूक विस्कळीत
भारत शिवराम फुळमाळीने आत्महत्येचा प्रयत्न केल्यामुळे काही काळासाठी हार्बरची वाहतूक थांबवण्यात आली होती. यामुळे दुपारी काही तासांसाठी हार्बरची वाहतूक विस्कळीत झाली होती. पण लवकरच परिस्थिती नियंत्रणात आली. तोपर्यंत प्रवाशांचे हाल झाले.
