पुणे : मुंबई पुणे एक्सप्रेस वे वर खंडाळा घाटातील आडोशी बोगद्याजवळ पुण्याकडून मुंबईच्या दिशेने प्रोपिलीन वायू घेऊन जात असलेला टँकर उलटला. टँकरमधून वायू गळती सुरू झाली. यानंतर खबरदारीचा उपाय म्हणून काही तासांसाठी दोन्ही बाजूची वाहतूक बंद करण्यात आली. काही काळानंतर एका बाजूने वाहतूक सुरू झाली. पण तोपर्यंत प्रचंड वाहतूक कोंडी झाली. ही कोंडी ३० तासांपेक्षा जास्त काळ झाला तरी सुटलेली नाही. कोंडी सुटण्याआधीच पुण्याकडे जाणाऱ्या मार्गावर पेट्रोलने भरलेल्या टँकरला अपघात झाला. या अपघातामुळे पुन्हा वाहतूक कोंडी झाली आहे.
बुधवारी रात्रीच्या सुमारास टोनी धाब्याजवळ पेट्रोलचा टँकर आणि एका भरधाव कंटेनर धडकला. हा अपघात इतका भीषण होता की, पेट्रोलचा टँकर हा महामार्गावरून खाली उतरला. या अपघातात दोन्ही पेट्रोलच्या टँकरचं प्रचंड नुकसान झालं आहे. तर कंटेनरच्या केबिनचंही मोठं नुकसान झालं आहे. सुदैवाने या अपघातात कोणतीही जीवितहानी झाल्याचं वृत्त नाही. घटनास्थळी पोलीस आणि अग्निशमन दलाच्या गाड्या पोहोचल्या आहेत. अपघातग्रस्त पेट्रोलचा टँकर आणि कंटेनर हटवण्याचं काम सुरू आहे.
आडोशी बोगद्याजवळ उलटलेल्या टँकरमधील प्रोपिलीन वायू दुसऱ्या टँकरमध्ये भरण्याचे काम पण सुरू आहे. पण दोन अपघातांमुळे मुंबई पुणे एक्सप्रेस वे वर प्रचंड वाहतूक कोंडी झाली आहे. परिस्थिती नियंत्रणात आणण्यासाठी आपत्कालीन यंत्रणा, पोलीस आणि महामार्ग प्रशासन युद्धपातळीवर प्रयत्न करत आहे. सुरक्षिततेचा पूर्ण आढावा घेतल्यानंतरच महामार्ग पूर्णपणे खुला केला जाईल, अशी माहिती प्रशासनाकडून देण्यात आली आहे. तोपर्यंत प्रवाशांना पर्यायी मार्गांचा वापर करण्याचे आवाहन करण्यात आले आहे.
ताम्हिणी घाट मार्ग: पुणे → पौड → ताम्हिणी घाट → माणगाव → मुंबई. (दक्षिण मुंबईसाठी उपयुक्त)
माळशेज घाट मार्ग: पुणे → चाकण → नारायणगाव → माळशेज घाट → कल्याण/ठाणे. (उपनगरांसाठी उपयुक्त) कृपया लोणावळा-खंडाळा मार्ग पूर्णपणे टाळावा. प्रवासाचा वेळ ३-५ तासांनी वाढू शकतो, त्यामुळे पुरेसे इंधन आणि पाणी सोबत ठेवावे.
