मुंबई : दिवंगत उद्योगपती रतन टाटा यांचे विश्वासू सहकारी मानले जाणारे प्रमित झवेरी यांनी ‘सर दोराबजी टाटा ट्रस्ट’च्या विश्वस्त पदावरून पायउतार होण्याचा निर्णय घेतला आहे. झवेरी यांचा कार्यकाळ ११ फेब्रुवारी २०२६ रोजी संपत असून, त्यांनी फेरनियुक्तीस नकार दिला आहे.
झवेरी यांनी टाटा ट्रस्ट्सचे विद्यमान अध्यक्ष नोएल टाटा यांना ३१ जानेवारी रोजी औपचारिक पत्र लिहून निर्णयाची माहिती दिली. ‘माझा कार्यकाळ ११ फेब्रुवारी २०२६ रोजी संपत आहे व त्यानंतर मी पुन्हा विश्वस्त म्हणून काम पाहू इच्छित नाही,’ असे त्यांनी पत्रात नमूद केले आहे. या संदर्भात त्यांनी नोएल टाटांशी आधीच चर्चा केली होती. झवेरी हे सिटी बँकेचे माजी प्रमुख आहेत. ते आर्थिक सल्लागार म्हणून ट्रस्टमध्ये कार्यरत आहेत.
