मुंबई : राष्ट्रवादी काँग्रेस पक्षाकडे सध्या जे आहे त्यात राज्याचे उपमुख्यमंत्रिपद हे सर्वात मोठे पद आहे. यामुळेच हे पद अजित पवारांच्या पश्चात सुनेत्रा पवार यांनी स्वीकारावे अशी आमची इच्छा आहे. एकदा सुनेत्रा पवार राज्याच्या उपमुख्यमंत्री झाल्या की त्यांच्या नेतृत्वात इतर राजकीय प्रश्न सोडवता येतील, असे राष्ट्रवादी काँग्रेसने नेते आणि मंत्री छगन भुजबळ म्हणाले.
दोन्ही राष्ट्रवादी काँग्रेस विलीन करण्याबाबत चर्चा सुरू होती का ? या प्रश्नावर पक्षाशी संबंधित सर्व राजकीय प्रश्न सुनेत्रा पवार राज्याच्या उपमुख्यमंत्री झाल्या की त्यांच्या नेतृत्वात सोडवता येतील असेच भुजबळ पुन्हा म्हणाले. पत्रकारांशी संवाद साधताना सुनेत्रा पवार यांना उपमुख्यमंत्री करण्याबाबत पक्ष आग्रही आणि ठाम असल्याचे भुजबळ म्हणाले.
सुनेत्रा पवार यांना उपमुख्यमंत्री करणार किंवा कसे याबाबत मला कोणतीही माहिती नाही असे शरद पवारांनी सांगितले. या संदर्भात आत्ता मी बोलू शकत नाही. पण सुनेत्रा पवार यांना उपमुख्यमंत्री करावे ही माझ्या पक्षाची भूमिका मी पुन्हा एकदा आपल्यापुढे ठामपणे मांडेन असे छगन भुजबळ म्हणाले.
राष्ट्रवादी काँग्रेसने शुक्रवारी काढलेल्या प्रसिद्धीपत्रकानुसार पक्षाच्या आमदारांची आज म्हणजेच शनिवार ३१ जानेवारी २०२६ रोजी मुंबईतील मुख्यालयात बैठक होणार आहे. या बैठकीत पक्षाचा गटनेता निवडला जाणार आहे. अजित पवारांच्या निधनामुळे रिक्त झालेल्या गटनेता या पदासाठी निवडीची प्रक्रिया आजच पूर्ण केली जाणार आहे. या निवड प्रक्रियेनंतर राष्ट्रवादी काँग्रेसचे शिष्टमंडळ मुख्यमंत्र्यांची भेट घेणार आहे. या भेटीनंतर राज्यपालांकडे शपथविधीसाठी वेळ मागितला जाईल आणि लवकरच सुनेत्रा पवार राज्याच्या उपमुख्यमंत्री या पदाची शपथ घेतील, असे सूत्रांकडून समजते.
