गटाऐवजी भाजप स्वतंत्रपणे नगरसेवकांची करणार नोंदणी
मुंबई : राज्याचे उपमुख्यमंत्री अजित पवार यांच्या निधनानंतर तीन दिवसांचा दुखवटा संपल्यानंतर येत्या सोमवारी भाजप नगरसेवकांची नोंदणी विभागीय कोकण आयुक्तांकडे केली जाणार आहे. शिवसेना आणि भाजप यांच्यातील गटनोंदणीची चर्चा असतानाच सोमवारी भाजपच्यावतीने स्वतंत्र नोंदणीची प्रक्रिया केली जाणार आहे. त्याचवेळी शिवसेना एकत्र नोंदणी करते की स्वतंत्रपणे नोंदणी करणार याकडे सर्वांचे लक्ष आहे.
मुंबई महापालिकेच्या निवडणुकीत भाजपचे ८९ नगरसेवक निवडून आले असून शिवसेनेचे २९ नगरसेवक निवडून आले आहेत. आतापर्यंत काँग्रेस, एमआयएम, मनसे तसेच उबाठाच्या नगरसेवकांची नोंदणी कोकण भवनमध्ये झाल्यानंतर पुढील नोंदणीची औपचारिकता महापालिका सचिव विभागातही पार पडली आहे; परंतु भाजप आणि शिवसेनेची कोकण भवनमधील नोंदणी अद्याप झालेली नाही. त्यातच उपमुख्यमंत्री अजित पवार यांचे विमान अपघातात निधन झाल्यामुळे तीन दिवसांच्या दुखवट्यामुळे ही नोंदणी लांबणीवर पडली होती.
भाजप आणि शिवसेनेच्या नगरसेवकांची एकत्रपणे गटनोंदणीची चर्चा सुरु असतानाच सोमवारी केवळ भाजप नगरसेवकांचीच गटनोंदणी होणार आहे. त्यांच्यासोबत शिवसेनेचे नगरसेवक एकत्रपणे असतील किंवा नाही याबाबत कोणतीही अधिकृत माहिती नाही. त्यामुळे दोन्ही पक्षांकडून आपल्या नगरसेवकांची नोंदणी आणि पक्षाची नोंदणी करत गटनेते पदाची निवड केली जाईल, अशी माहिती मिळत आहे. आतापर्यंत समाजवादी पक्षाच्या एका नगरसेवकाची नोंदणी झालेली असून एका नगरसेवकाची नोंदणी शिल्लक आहे. त्यामुळे अजित पवार यांच्या राष्ट्रवादीच्या तीन नगरसेवक हे महायुतीतील घटक पक्ष म्हणून स्वतंत्र न गट म्हणून न राहता शिवसेनेसोबत गट म्हणून नोंदणी करु शकतील, असेही बोलले जात आहे.
