भिवंडी : कर्करोगाच्या चौथ्या टप्प्यात उपचार सुरू असताना एका महिलेवर हुंड्याच्या हव्यासापोटी अमानुष छळ केल्याचा गंभीर प्रकार भिवंडीत उघडकीस आला आहे. पीडितेच्या थेट तक्रारीनंतर पती आणि सासरच्या सदस्यांविरोधात महाराष्ट्रातील अंधश्रद्धा व अमानवी प्रथा प्रतिबंधक कायद्यानुसार कठोर गुन्हा दाखल करण्यात आला आहे.
३६ वर्षीय पीडित महिला सध्या भिवंडीमध्ये वास्तव्यास असून ती जीवघेण्या आजाराशी लढा देत आहे. पोलिस तपासात समोर आलेल्या माहितीनुसार, विवाहानंतर अनेक वर्षे हुंड्याच्या मागणीसाठी तिला शारीरिक तसेच मानसिक त्रास दिला जात होता. आजारपणालाच कारणीभूत धरत तिला अपशकुनी ठरवून अघोरी कृत केल्याचा आरोप तिने केला आहे.
तक्रारीप्रमाणे, गंभीर आजाराचे निदान झाल्यानंतर उपचारासाठी मदत करण्याऐवजी छळ अधिक तीव्र करण्यात आला. डिसेंबर २०२५ मध्ये पतीने तिला अल्पवयीन मुलासह घराबाहेर काढले. यावेळी तिच्या बहिणी आणि मुलावर मारहाण झाल्याचेही समोर आले आहे.
यानंतर जानेवारी २०२६ मध्ये पीडित महिला राहत असलेल्या घराबाहेर जादूटोणाशी संबंधित साहित्य ठेवण्यात आल्याची घटना घडली. हा प्रकार केवळ मानसिक दहशत निर्माण करण्यासाठी नव्हे, तर गंभीर धोका निर्माण करण्याच्या उद्देशाने केल्याचा संशय पोलिसांनी नोंदवला आहे.
या प्रकरणात पती योगेशकुमार केशरवानी याच्यासह त्याचे आई-वडील आणि इतर नातेवाइकांविरोधात भारतीय न्याय संहितेतील गंभीर कलमे तसेच महाराष्ट्र नरबळी व अमानुष, अनिष्ट प्रथा प्रतिबंधक कायद्यांतर्गत गुन्हा नोंदवण्यात आला आहे. निजामपूरा पोलीस ठाण्याचे अधिकारी या प्रकरणाचा तपास करत असून आरोपींच्या भूमिकेबाबत सखोल चौकशी सुरू आहे.
