अनुभवी अधिकाऱ्यांची फळी निवृत्त
नवी मुंबई : नवी मुंबई महापालिकेत काम करणारे अधिकारी व कर्मचाऱ्यांची फौज सेवानिवृत्त झाली आहे. २०२६ या वर्षात आणखीन काही अधिकारी सेवानिवृत्तीच्या उंबरठ्यावर येऊन पोहोचले आहेत. अशात महापालिकेत ७५० रिक्त जागांची पोकळी निर्माण झाली आहे.
नवी मुंबई महापालिका सध्या एका मोठ्या प्रशासकीय संक्रमणातून जात आहे. शहराचा विस्तार आणि नागरी गरजा वाढत असताना, गेल्या पाच वर्षात महापालिकेच्या सेवेतून मोठ्या संख्येने अनुभवी अधिकारी व कर्मचारी सेवानिवृत्त झाले आहेत. या निवृत्तीमुळे निर्माण झालेली रिक्त पदे भरण्यासाठी प्रशासनाने आता कंबर कसली आहे. २० जानेवारीच्या उपलब्ध असलेल्या प्रशासकीय माहितीनुसार, महापालिकेच्या आस्थापना विभागाकडून चालू वर्षातील सेवानिवृत्त होणाऱ्या कर्मचाऱ्यांची यादी अद्ययावत करण्याचे काम सुरू आहे. १ जानेवारी २०२५ च्या सेवाज्येष्ठता सूचीनुसार, तांत्रिक, वैद्यकीय आणि प्रशासकीय विभागातील अनेक वरिष्ठ अधिकारी यावर्षी निवृत्त होत आहेत. जरी संपूर्ण वर्षाची एकत्रित अधिकृत संख्या वर्षाच्या अखेरीस स्पष्ट होत असली, तरी दरमहा सरासरी २५ ते ३० कर्मचारी निवृत्त होत आहेत.
गेल्या पाच वर्षांत नवी मुंबई महापालिकेने अनुभवी नेतृत्वाची मोठी फळी निवृत्त होताना पाहिली आहे. मे २०२५ मध्ये एकाच वेळी ३१ अधिकारी, कर्मचारी आणि शिक्षकांचा सेवानिवृत्ती सोहळा पार पडला होता. यामध्ये अतिरिक्त शहर अभियंता संजय खताळ, कार्यकारी अभियंता मनोहर सोनवणे आणि स्त्रीरोगतज्ज्ञ डॉ. जया श्रीनिवासन यांसारख्या महत्त्वाच्या पदांवरील व्यक्तींचा समावेश होता.