७१.५६ टक्के विक्रमी मतदानासह विजयी
ठाणे : ठाणे महापालिकेच्या निवडणुकीत भाजपने ३९ पैकी २८ जागा जिंकत सुमारे ७५ टक्के स्ट्राईक रेट राखला आहे. या २८ विजयी नगरसेवकांमध्ये नौपाडा प्रभागातील प्रतिभा राजेश मढवी या उमेदवार ७१.५६ टक्के मतांसह भाजपमधील सर्वाधिक मताधिक्याने विजयी ठरल्या आहेत.
नौपाडा प्रभाग क्रमांक २१ ब मध्ये एकूण २५ हजार ७७ मतांपैकी प्रतिभा मढवी यांना तब्बल १७ हजार ९४५ मते मिळाली. डॉ. राजेश मढवी फाऊंडेशनच्या माध्यमातून गेली अनेक वर्षे सुरू असलेल्या सामाजिक कार्याची ही मतदारांकडून मिळालेली पोहोचपावती असल्याचे मानले जात आहे.
ठाणे महापालिका निवडणुकीत शिवसेनेसोबत महायुतीत असलेल्या भाजपने निर्विवाद यश मिळवले आहे. २०१७ मध्ये भाजपच्या २३ जागा होत्या; यंदा त्यात ५ जागांची भर पडली आहे. पंतप्रधान नरेंद्र मोदी, मुख्यमंत्री देवेंद्र फडणवीस यांच्या नेतृत्वाखाली आमदार संजय केळकर, निवडणूक प्रभारी आमदार ॲड. निरंजन डावखरे आणि भाजप जिल्हाध्यक्ष संदीप लेले यांच्या मार्गदर्शनाखाली पक्षाने ओवळा ते शिळपर्यंत सर्व विधानसभा मतदारसंघांत मजबूत कामगिरी केली. दरम्यान, भाजप–शिवसेना महायुतीतून ठाण्यात लढलेल्या एकूण १३१ जागांपैकी सात उमेदवारांना ७० टक्क्यांहून अधिक मतदान मिळाले आहे. यामध्ये शिवसेनेचे योगेश जानकर (७६.४६ टक्के) अव्वल ठरले असून, त्यापाठोपाठ डॉ. दर्शना जानकर (७२.३३ टक्के) आणि भाजपच्या प्रतिभा मढवी (७१.५६ टक्के) यांनी लक्षवेधी कामगिरी केली आहे.
