कराची : पाकिस्तानमधील आर्थिक परिस्थिती अजूनही सुधारण्याची कोणतीही ठोस चिन्हे दिसत नाहीत. आंतरराष्ट्रीय नाणेनिधी, वर्ल्ड बँक तसेच मित्र राष्ट्रांकडून मिळालेल्या मदतीनंतरही देशातील महागाईने सामान्य नागरिकांचा श्वास कोंडला आहे. ताज्या आकडेवारीनुसार, पाकिस्तानमध्ये सलग २३ आठवड्यांपासून महागाई दरात वाढ नोंदवली जात आहे.
धान्य, मांस, खाद्यतेल आणि स्वयंपाकातील अत्यावश्यक वस्तूंच्या किमती सातत्याने चढत असल्याने घरगुती बजेट कोलमडले आहे. परिणामी, अनेक कुटुंबांसाठी रोजच्या जेवणातील पदार्थ कमी होताना दिसत आहेत.
साप्ताहिक महागाई दरात अखंड वाढ
मिळालेल्या माहितीनुसार, ८ जानेवारीलाच्या आठवड्यात महागाई दरात पुन्हा वाढ झाली. गहू पीठ, तांदूळ, साखर, चिकन यांसह अनेक जीवनावश्यक वस्तूंच्या किरकोळ दरात झालेल्या वाढीमुळे हा दर वर चढला आहे. मिळालेल्या आकडेवारीनुसार, दर आठवड्याला महागाईचा आलेख वरच जात असल्याचे स्पष्ट होते आहे.
या वस्तूंनी वाढवली महागाई
अलीकडील आठवड्यात गहू पीठ, चिकन, लसूण, मिरची पावडर, एलपीजी, चहा, साखर आणि बासमती तांदूळ या वस्तूंच्या किमतींमध्ये लक्षणीय वाढ झाली आहे. काही वस्तूंच्या दरात वार्षिक आधारावर दहापासून तीस टक्क्यांपर्यंत उसळी पाहायला मिळत आहे. या काळात सुमारे वीसहून अधिक अत्यावश्यक वस्तू महाग झाल्या, तर काहींचे दर स्थिर राहिले.
चिकन-भात सामान्यांच्या ताटातून गायब
वाढत्या महागाईचा थेट परिणाम नागरिकांच्या जेवणावर होत आहे. अन्नपदार्थांच्या आंतरराष्ट्रीय किंमत संकेतस्थळांवरील माहितीनुसार, पाकिस्तानमध्ये चिकनचा दर प्रति किलो सुमारे ८४० पाकिस्तानी रुपयांपर्यंत पोहोचला आहे, तर तांदूळ सुमारे ३२० रुपये किलोने विकला जात आहे. दूध, अंडी, ब्रेड, भाज्या आणि फळांचे दरही लक्षणीयरीत्या वाढले असून, दैनंदिन गरजांची पुरवणे सामान्यांसाठी कठीण बनले आहे.
फळांच्या बाबतीतही परिस्थिती वेगळी नाही. सफरचंद, केळी आणि संत्री यांसारखी फळेही आता अनेकांच्या आवाक्याबाहेर जात असल्याचे चित्र आहे. हे दर बदलू शकतात, मात्र सध्याची स्थिती महागाईचा ताण किती तीव्र आहे, हे स्पष्टपणे दाखवत आहे.एकीकडे आर्थिक मदतीचे प्रयत्न सुरू असताना, दुसरीकडे महागाईचा हा वाढता आलेख पाकिस्तानच्या अर्थव्यवस्थेपुढील आव्हाने अधिकच गंभीर करत आहे.
