Dashavatar Oscars 2026:‘ मराठी सिनेमा सृष्टीसाठी आजचा दिवस हा गौरवाचा ठरला आहे..मराठी ज्येष्ठ अभिनेते दिलीप प्रभावळकर यांच्या मुख्य भूमिकेतील आणि सुबोध खानोलकर दिग्दर्शित केलेला ‘दशावतार’ हा चित्रपट आगामी ९८ व्या ऑस्कर पुरस्कारांच्या (Oscars २०२६) ‘कंटेंशन लिस्ट’ मध्ये स्थान मिळवण्यास यश प्राप्त झालं आहे. अशा प्रकारे ऑस्करच्या मुख्य स्पर्धेत स्थान मिळवणारा हा पहिलाच मराठी चित्रपट ठरला आहे. हा दिवस महाराष्ट्रासाठी ऐतिहासिक ठरला आहे...
साधारणपणे भारत सरकार एका चित्रपटाची अधिकृत एन्ट्री ऑस्करसाठी करतो, आणि यंदा नीरज घेवान यांचा ‘होमबाउंड’ हा चित्रपट भारताची अधिकृत निवड आहे. मात्र, ‘दशावतार’चे निर्माते यांनी हा चित्रपट स्वतंत्रपणे ऑस्करच्या मुख्य ‘ओपन जनरल’ कॅटेगरीसाठी पाठवला होता. जगभरातील हजारो चित्रपटांमधून निवडल्या गेलेल्या १५०–२५० चित्रपटांच्या यादीत ‘दशावतार’ने आपले स्थान निश्चित केले आहे. या यादीत ‘होमबाउंड’, ‘सीस्टर मीडनाइट’, ‘तन्वी द ग्रेट’, ‘टुरिस्ट फॅमिली’ आणि ‘कांतारा चाप्टर १’ यांसारखे चित्रपटही आहेत. ‘दशावतार’ चित्रपट कोकणातील पारंपरिक ‘दशावतार’ कला, स्थानिक संस्कृती आणि अवैध उत्खननामुळे पर्यावरणावर होणाऱ्या परिणामांवर भाष्य करतो. ८१ व्या वर्षी दिलीप प्रभावळकर यांनी ‘बाबुली मेस्त्री’ ही मध्यवर्ती भूमिका साकारली आहे. त्यांच्या सोबत महेश मांजरेकर, भरत जाधव, सिद्धार्थ मेनन आणि प्रियदर्शिनी इंदलकर यांसारख्या लोकप्रिय कलाकारांची फौज आहे.
२ सप्टेंबर २०२५ रोजी प्रदर्शित झालेल्या या चित्रपटाने बॉक्स ऑफिसवरही तगडी कमाई केली आणि २८ कोटींहून अधिक कमाई करत २०२५ मधील सर्वात यशस्वी मराठी चित्रपटांपैकी एक ठरला. दिग्दर्शक सुबोध खानोलकर यांनी या यशाबद्दल सांगितले, “हा क्षण ‘दशावतार’चा नाही, तर संपूर्ण मराठी भाषेचा सन्मान आहे.” झी स्टुडिओज आणि ओशन फिल्म कंपनीने यशाचे वर्णन “लाल मातीतील कथेची जागतिक भरारी” असे केले आहे.
