मुंबई : भारतीय जनता पार्टीचे विधान परिषदेतील माजी आमदार, अभाविपचे माजी राष्ट्रीय अध्यक्ष डॉ. अशोक मोडक यांचे वृद्धापकाळाने निधन झाले. त्यांच्यावर उद्या सकाळी ११ वाजता पवई येथे अंत्यसंस्कार होणार आहे. याआधी अंत्यदर्शनासाठी पार्थिव पवईच्या घरी ठेवले जाईल.
अशोक मोडक जन्म मुंबईत १९४० मध्ये झाला. पुणे विद्यापीठातून आधी अर्थशास्रात आणि नंतर राज्यशास्त्रात कला शाखेतून पदव्युत्तर पदवी अर्थात एमए करणाऱ्या अशोक मोडक यांनी दिल्लीच्या जेएनयूमधून पीएचडी केले. त्यांचा डॉक्टरेटचा विषय "भारताला सोव्हिएत आर्थिक मदत" हा होता. शिक्षण क्षेत्रातील त्यांच्या योगदानाची दखल घेऊन, भारत सरकारने त्यांना ६ जानेवारी २०१५ रोजी पाच वर्षांच्या कालावधीसाठी राष्ट्रीय संशोधन प्राध्यापक पदासाठी नामांकित केले. भारतीय सांस्कृतिक संबंध परिषदेचे (ICCR) अध्यक्ष प्रोफेसर लोकेश चंद्र यांनी डॉ. मोडक यांना तीन वर्षांच्या कालावधीसाठी ICCR च्या पुनर्गठित महासभेचे सदस्य म्हणून २१ जानेवारी २०१६ रोजी त्यांना नियुक्त केले.
मोडक यांनी १९६३ मध्ये जळगावमधील चाळीसगाव येथील कला, विज्ञान आणि वाणिज्य महाविद्यालयात अर्थशास्त्र विषयाचे व्याख्याता म्हणून आपल्या अध्यापन कारकिर्दीला सुरुवात केली . नंतर मुंबईतील रामनारायण रुईया महाविद्यालयात व्याख्याता म्हणून काम केल्यानंतर ते मुंबई विद्यापीठाच्या सोव्हिएत अभ्यास केंद्रात रीडर म्हणून रुजू झाले. शैक्षणिक क्षेत्रात भरीव कामगिरी करणाऱ्या अशोक मोडक यांना १९९४ मध्ये भारतीय जनता पार्टीने विधान परिषदेची उमेदवारी दिली. ते १९९४ आणि २००० मध्ये विधान परिषदेची निवडणूक जिंकले. कोकण पदवीधर मतदारसंघाचे आमदार म्हणून त्यांनी चांगले काम केले.
मुंबई विद्यापीठाने त्यांना सेंटर फॉर सेंट्रल युरेशियन स्टडीजमध्ये सहायक प्राध्यापकाचे मानद पद देऊ केले. ही जबाबदारी स्वीकारत २००६ मध्ये अशोक मोडक यांनी पुन्हा एकदा शिक्षण क्षेत्रात स्वतःला झोकून दिले. मोडक यांनी यूएसएसआर (सोव्हिएत रशिया) , नेदरलँड्स, युनायटेड किंग्डम, माजी युगोस्लाव्हिया अशा अनेक देशांमध्ये संशोधनाचे कार्य केले. अमेरिकेने त्यांना महासत्तेशी संबंधित चर्चासत्रांमध्ये सहभागी होण्यासाठी १९८६ मध्ये विशेष आमंत्रण दिले होते. त्यांनी जेएनयू, नवी दिल्ली तसेच ओरिएंटल इन्स्टिट्यूट, मॉस्को (रशिया) आणि इन्स्टिट्यूट ऑफ सोशल स्टडीज , द हेग, नेदरलँड्स येथे संशोधनाचे मोठे कार्य केले.
अशोक मोडक यांनी ३० पुस्तके, १०४ हून अधिक शोधनिबंध लिहिले आहेत. त्यांनी इंटरनॅशनल स्टडीज, जर्नल ऑफ इंडियन कौन्सिल ऑफ वर्ल्ड अफेयर्स नवी दिल्ली आणि इटरनल इंडिया नवी दिल्ली यांसारख्या नियतकालिकांमध्ये, वृत्तपत्रांमध्ये आणि मासिकांमध्ये लेखन केले आहे. मुंबईच्या विधान परिषदेने त्यांचा १९९७ मध्ये सर्वोत्कृष्ट संसदपटू पुरस्कार देऊन गौरव केला होता. पी.बी. भावे वक्ते पुरस्कार, लेखक-पुरस्कार आणि छत्रपती संभाजी महाराज पुरस्कार देखील त्यांना मिळाला होता. मोडक यांनी विविध मंच आणि समित्यांमध्ये स्वेच्छेने सहभाग घेतला.
अशोक मोडक यांनी लिहिलेली निवडक पुस्तके
- सोव्हिएत युनियनचा आर्थिक इतिहास
- गोर्बाचेव्ह युगाचे विश्लेषण
- गोपाळ कृष्ण गोखले यांचे आर्थिक विचार
- एक खरे समाजवादी विचारवंत - डॉ. राम मनोहर लोहिया
- स्वामी विवेकानंद समाजवादी होते का?
- पश्चिम बंगालमध्ये डाव्या आघाडीचे राज्य - उत्पत्ती, वाढ आणि क्षय
- १८५७ चा भागेरा - द्रष्टी व मतांतर
- हिंदूत्व - न्यायालयीन निवाडा आणि सेकुलर आग पाहा
- नामदार गोपाळ कृष्ण गोखले
- श्री गुरुजी - जीवन आणि कार्य
- धर्मपाल - शोध आणि बोध
- शिक्षण भगवीकरण - आक्षेप आणि तथ्य
- राष्ट्र विचाराचे सामाजिक आशय
- विवेकानंद - विचार आणि विषयस्तिथी
- स्वामी विवेकानंद - चिंतन चैतन्याचा स्रोत
