मुंबई: बॉलिवूडचा भाईजान अर्थात सलमान खानने साठीमध्ये पदार्पण केले आहे. सलमान आज त्याचा ६० वा वाढदिवस साजरा करणार आहे. सलमानच्या वाढदिवसानिमित्त चाहत्यांमध्येही वेगळाच उत्साह दिसून येत आहे. सलमानचा जन्म २७ डिसेंबर १९६५ रोजी झाला असून आज ६०व्या वयात ही सिनेसृष्टीत तो तेवढाच सक्रिय आणि 'फिट' आहे, जेवढा तो त्याच्या तारुण्यात होता. मुळात भाईजान आता साठीचा झाला आहे हे त्याच्या दिसण्यावरून जाणवतही नाही. आजच्या वाढदिवसाची एक खास गोष्ट म्हणजे, ६०व्या वाढदिवसानिमित्त वांद्रे-वरळी सिलिंक वर सलमानची प्रतिमा असलेली रोषणाई करत त्याला शुभेच्छा देण्यात आल्या आहेत.
सिनेसृष्टीत गेल्या तीन दशकांपासून बॉक्स ऑफिसवर राज्य करणाऱ्या सलमानचा इथपर्यंतचा प्रवास अत्यंत रंजक आणि चढ-उतारांचा राहिला आहे. सलमानने १९८८ मध्ये 'बीवी हो तो ऐसी' या चित्रपटातून एका साहाय्यक भूमिकेद्वारे बॉलिवूडमध्ये पदार्पण केले. मात्र, खऱ्या अर्थाने त्याला ओळख मिळवून दिली ती १९८९ मध्ये आलेल्या 'मैने प्यार किया' या चित्रपटाने. या सिनेमासाठी त्याला सुरुवातीला केवळ ३१,००० रुपये मानधन मिळाले होते, जे नंतर वाढवून ७५,००० रुपये करण्यात आले. या चित्रपटाने सलमानला रातोरात 'स्टार' बनवले.
गाजलेले चित्रपट
सलमानच्या करिअरमध्ये अनेक चढ-उतार आले, पण त्याने प्रत्येक वेळी कमबॅक केले. ९० च्या दशकात त्याचे साजन, हम आपके हैं कौन, करण अर्जुन, हम दिल दे चुके सनम हे सिनेमे गाजले तर.२००९ नंतर वॉन्टेड, दबंग, बॉडीगार्ड, एक था टायगर, अशा काही सिनेमांनी रेकॉर्ड ब्रेक कमाई केली. तर बजरंगी भाईजान, सुलतान, टायगर जिंदा है या सिनेमांनी कोट्यावधींची कमाई करत त्याला पुन्हा सुपरस्टार केले. अशाप्रकार भाईजानने आजवर विविध साहसी, प्रेमळ भुमिकांनी चाहत्यांचे मन जिंकले आहे.
