मुंबई : एनबीसीसी (इंडिया) लिमिटेड आणि मुंबई बंदर प्राधिकरण (एमबीपीए) यांनी मुंबई पोर्टच्या जमिनीवर विविध विकास प्रकल्प राबवण्यासाठी २३ डिसेंबर २०२५ रोजी एका सामंजस्य करारावर स्वाक्षरी केली आहे. या प्रकल्पानुसार मुंबई पोर्टच्या २५ एकर जमिनीवर (कॉटन ग्रीन डेपो जवळ) 'सेंट्रल गव्हर्नमेंट ऑफिस' (CGO) कॉम्प्लेक्स विकसित करण्यात येणार आहे.
या नियोजित विकासामध्ये प्रामुख्याने सी.जी.ओ. कॉम्प्लेक्स, एक प्रतिष्ठित 'आयकॉनिक' इमारत, बहुमजली कार पार्किंग, आंतरराष्ट्रीय संमेलन केंद्र, रस्ते, इमारती, शेड आणि साठवण क्षेत्रांची देखभाल अशा प्रकल्पांचा समावेश आहे. एनबीसीसी या प्रकल्पासाठी प्रकल्प व्यवस्थापन सल्लागार (PMC) आणि अंमलबजावणी संस्था म्हणून काम करेल. यासाठी कंपनीला एकूण प्रकल्प खर्चाच्या ७% शुल्क (GST वगळून) आकारण्याची परवानगी देण्यात आली आहे. या करारावर मुंबई बंदर प्राधिकरणाचे उपाध्यक्ष आदेश तितरमारे आणि एनबीसीसीचे अध्यक्ष व व्यवस्थापकीय संचालक के.पी. महादेवस्वामी यांनी स्वाक्षरी केली आहे. हा प्रकल्प मुंबई पोर्टच्या जमिनीचा योग्य वापर करून आधुनिक पायाभूत सुविधा निर्माण करण्याच्या दृष्टीने एक महत्त्वाचे पाऊल मानले जात आहे.
