भाईंदर : भाईंदरमधून धक्कादायक बातमी समोर आली आहे. दिवसेंदिवस बिबट्याची दहशत ही वाढत चालली असताना मीरा-भाईंदरच्या बीपी रोड मागच्या तलाव रोड परिसरातील साईबाबा हॉस्पिटलच्या शेजारी असलेल्या पारिजात इमारतीत एका घरात बिबट्या थेट घुसला. यावेळी एका घरात असलेल्या २५ वर्षांची एक तरूणी आणि ३ पुरूष असा एकूण चार जणांवर बिबट्याने हल्ला केला. घरातील व्यक्तींचा आरडाओरडा ऐकून आजूबाजूच्या लोकांना ही घटना समजली.
मिळालेल्या माहितीनुसार, बिबट्याच्या हल्ल्यात आत्तापर्यंत ३ जण जखमी झाले आहेत. अग्निशमन दलाचे जवान आणि पोलीस घटनास्थळी दाखल झाले असून त्या बिबट्याा जेरबंद करण्याचे प्रयत्न सुरू आहेत. जखमींवर नजीकच्या रुग्णालयात उपचार सुरू असल्याची देखील माहिती समोर आली आहे. तसेच आजूबाजूच्या नागरिकांना सतर्क राहण्याचे आवाहनही करण्यात आलं आहे .
वनविभागाचे अधिकारीही घटनास्थळी दाखल झाले आहेत. मात्र घटनास्थळी नागरिकांची आणि बघ्यांची मोठी गर्दी जमल्यामुळे अग्निशमन दलाच्या जवानांनी बिबट्याला एका रूममध्ये बंद करून ठेवले असून त्याला पकडण्याचे प्रयत्न सुरू आहेत.
