मोहित सोमण: आज चांदीच्या दरात मोठी वाढ झाली आहे. सलग तिसऱ्यांदा चांदीत मोठी वाढ झाली असल्याने चांदी आज प्रति किलो ३००० रूपयांनी वाढली असून गेल्या तीन दिवसात ६००० रूपयांनी वाढ झाली आहे. तर एका आठवड्यात चांदी ८३०० रुपयांनी वाढली आहे. तर महिन्यात चांदीच्या दरातही २०% वाढ झाली असून आगामी काळातही तज्ञांच्या मते बाजारात फेरबदल अपेक्षित होऊन चांदी एका नव्या पातळीवर जाऊ शकते. युएस फेडरल रिझर्व्ह व्याजदरात कपातीची अपेक्षा असल्याने व आंतरराष्ट्रीय स्तरावरील चांदीच्या मागणीत मोठ्या प्रमाणात वाढ झाल्याने चांदी दरपातळी आजही महागली आहे. 'गुडरिटर्न्स' संकेतस्थळावरील माहितीनुसार चांदीच्या प्रति ग्रॅम दरात आज ३ रूपयांनी वाढ झाली असून प्रति किलो दर ३००० रुपयांनी वाढल्याने प्रति ग्रॅम दर १९० व प्रति किलो दर १९०००० रुपयांवर पोहोचली आहे. मुंबईसह भारतातील प्रमुख शहरातील चांदीचे सरासरी प्रति १० ग्रॅम दर १९०० तर प्रति किलो दर १९०००० रूपयांवर पोहोचले आहेत.
भारतीय कमोडिटी बाजारातील एमसीएक्समध्ये (Multi Commodity Exchange MCX) चांदीच्या निर्देशांकात संध्याकाळपर्यंत २.७९% वाढ झाल्याने दरपातळी १८३१०० रूपयांवर पोहोचली आहे. जागतिक बाजारातील सिल्वर फ्युचर निर्देशांकात संध्याकाळपर्यंत २.७२% वाढ झाली आहे. पुढील आठवड्यात युएस फेडरल रिझर्व्ह व्याजदरातील निर्णय युएस फेड गव्हर्नर जेरोमी पॉवेल जाहीर करतील. बाजार तज्ञांच्या मते ही दरकपात झाल्यास त्याचा मोठा फायदा बाजारात होईल दरम्यान तत्पूर्वी सोन्याच्या व चांदीच्या दरात चढ उतार मोठ्या प्रमाणात राहू शकते. खासकरून युएस बाजारातील घसरलेल्या रोजगार आकडेवारीनंतर पीसीई आकडेवारी अद्याप प्रलंबित आहे. त्यामुळे पीसीई (Personal Consumption Expenditure PCE) आकडेवारी जाहीर झाल्यानंतर कमोडिटी बाजारातील पुढील दिशा स्पष्ट होईल. भूराजकीय घडामोडींचाही परिणाम होत असल्याने प्राईज करेक्शन पुढील आठवड्यात अपेक्षित असले तरी अस्थिरतेचा फटका चांदीच्या दरात बसत आहे. आज डॉलर किरकोळ घसरण अथवा सपाट स्थितीत कायम असल्याने गुंतवणूकदारांनी आपल्या होल्डिंग्समध्ये वाढ केल्याची शक्यता नाकारता येत नाही. अशा विविध कारणांमुळे आज चांदी महागली.
चांदीच्या किमतीतील दीर्घकालीन वाढीचा विचार केल्यास एमसीएक्सवरील स्पॉट प्राईस फक्त एका वर्षात ९८% वाढून ८९९१३ रुपयांवरून १७७८८६ रुपयांवर पोहोचली. उपलब्ध माहितीनुसार, दोन वर्षांत किंमत १३३% आणि ३ वर्षांत जवळजवळ १८२% वाढली असून एका दशकात चांदीच्या किमती ४१९% वाढल्या आहेत.
नवीन गुंतवणूकदारांसाठी तज्ञ काय म्हणाले?
नवीन गुंतवणूकदार हळूहळू एका लहान टप्प्यात गुंतवणूक करू शकतात जेणेकरून भविष्यातील कोणत्याही वाढीचा फायदा घेता येईल आणि अचानक किमतीच्या वेळी प्रवेश गुंतवणूकदारांना करण्याचा धोका टाळता येईल.